BERFÎN BAGDU / ANF / BEHDÎNAN
Endamê Konseyê Caardişî yê KCKyî Riza Altunî derheqê çîyê ke Kurdistan û Rojhelato Mîyanên de qewimîyenî û têkilîya ke hêzê mîyanneteweyî reyde yenî ronayîş de qisey kerd û melumatê muhîman pare kerd.
Endamê Konseyê Caardişî yê KCKyî Altunî qiseykerdişê xo de va ‘ganî ma bi hawayo baş bizanî ke ma senî Rojawan de resayî dûştêko winasî’ û wina dewam kerd: “Wexto ke krîzê Rojhelato Mîyanên dest pêkerd, têkoşînê 40 serran yê PKKyî estbî. No têkoşîn vera sîstemê kapîtalîst û emperyalîstî de ameyêne dayîş. No krîz zî têkoşînê ma hedef girewtêne û wexto ke merdim Sûrîye ra biewnîyo, na raştîye hîna baş vîneno. Cok ra xoverdayîş ra zêdeyêr sewbîna weçînite çinêbî. Hêzê emperyalîstî bi mabênkarîya DAIŞ, Nusra, Ehrar El Şam û sewbîna de hêrişê kurdan kerdî. Kurdî zî bi paradîgmaya Rayberîye û PKKyî cewab dayî.”
Altunî qiseykerdişê xo wina domna: “Wexto ke Sûrîye de pêrodayîş û xoverdayîş dest pêkerd, Tirkîya, Îran, Sûrîye û sewbîna dewletî destek dayênê hêzanê selefîyan. Hêrişê selefîyan heta xoverdayîşê Kobanê dewam kerd. Kobanê nuqtayêka muhîm bîye. Heta xoverdayîşê Kobanê ti hêzê mîyanneteweyî destek nêdayêne xoverdayîşê kurdan. Xoverdayîşê Kobanê û yê Şengalî wijdanê herkesî de ca girewt. Hêzê mîyanneteweyî ser de zextêko gird virazîya û mecbûr mendî ke mudaxale bikerî. Senî ke Şerê Cîhanî yo 2. de vera faşîzmê Hîtlerî de Amerîka û Yewîya Sovyetan îttîfaq viraştî, na rey zî mabênê Hêzê Koalîsyonî û YPGyî de têkilîye virazîyaye. Tîya de Amerîka seba ke herême de estena xo bidomno, mecbûr mend ke têkilîye rono. Çîyêko winasî Rojhelato Mîyanên de reya sifteyîne ya ke beno.”
Rojawan de warê azadî abîyî
Altunî qiseykerdişê xo de bale ant waro ke Rojawan de abî ser û wina va: “Ewja de hetêk de hêzê koalîsyonî estî û pey ci de hêzê kapîtalîzmî estî. Wexto ke merdim estena nê hêzan ra ewnîyeno, vîneno ke Rojawan de ser erdêko şenik de warêko azad ameyo awankerdiş. Tîya de hêzo ke bi destekê madî û manevî yê komelî şerê xo domneno. No hêz eynî wext de vera heme hêzê sîstemê kapîtalîzmî de têkoşînê xo dano domnayîş. Heme hêzê emperyalîstî hewl danî nê hêzî orte ra wedarnî. Heto bîn ra zî nê hêzî reyde tayê têkilîyî ronîyenî. Cok ra ganî merdim nakokî û pêrodayîşanê tîya baş fam bikero. Neke merdim têkilîyê ke Amerîka û Rûsya reyde ronîyenî fam nêkeno.
Mîyanê behrî de bîyayîşê girawêk
Altunî peynîya qiseykerdişê xo de qala awankerdişê warêko azad kerd û wina qedêna: “Mesela nika ma qala Federasyonê Vakurê Sûrîye yan zî Kantonê Cizîrî kenî. Wexto ke yeno vatiş beno ke merdim manaya ci fam nêkero. Labelê bîyayîşê federasyon yan zî kanton wina rehet nîyo. No yeno manaya ke merdim orteyê behrî de girawêk awan bikero. Yanî yê ke dişmenî bi hawayo baş nêzano, nêşêno azadîye xeyal bikero. Cok ra bi no hawa hewldayîşê famkerdişî ancax beno demagojî. O wext çîyê ke Rojawan de vejîyeno orte çî yo? Tîya de warê azadîye sey girawê şenikî vejîyenî orte û benî federasyon.”