Berecoy jû hekate binusnîne. Herkes zoneno, labelê ez hebê vurnen. Ez hal û mezalê Osmanî û yê Farisî ken ci.
Rozê Faris nîyadano ke Osman ha wo bi dowil û zurna, tanq û top hetê şîndorê Kurdîstanî ser sono.
Rojnamevanunê ‘demokratu’ yê Osmanî qislanê eskerîye de kamerayê xo nêro, eskeranê xo goynenê. Vanê ‘barê eskerê ma henke girano, qatirî bîle nêşîkînê honde bar poştkerê, eskerê ma qatiru ra hebêna jede teqetin yê.’
Fermandarê eskeran Büyüksapık vano ‘BBG evi.....,  her çî mara oseno, na raye.....’
Dewlet û milet bîyê jû, dowilanê qetilkerdenê danê piro. Keyf û kelebut o şîndorê Kurdîstanî de.
Televîzîyonî, rojnameyî û radonî erzenê. Dîna bi zuranê înan vêsena. Eskerî puf bîyê, kewtê binê barê qatiru xo tir û kasu rê gindir kenê. Vanê ‘na raye....’
Hebê ke raye ra şî, rastê Farisî benê.
Faris perseno vano ‘Oso, Oso kata sona, no çik o nîya, no keyf û kelebut yeno manê çinayî? Ti çond reye ama na het, onca cera ra şîya, xêr a, na raye se kena?’
Fermandar Büyüksapık vano ‘na raye some ....., endî peyser racerayene çîna, hatake ma pêro qirnêkerdî.’
Mavên ra heştê vêreno ra eskerê Osmanî tarvade girane ceno, onca peyser cereno ra. Raye ra onca rastê Farisî beno. Herdîsa eskeran bîya derge, benzûbetê xo şîyo, kewtê halo xiravin, heq dürî bero. Tayîne mereve de tumanê xo, tayîne çekê xo, tayîne kî weşîya xo caverda.
Faris onca perseno vano ‘Büyüksapık kotî ra yena, no sene halo sima tederê?’
Büyüksapık vano, ‘qe..., qe..., qe..., pe...,pe...pe...na...,na...,na....,ma.....’
Fars vano ‘nê lalawo se bî, to zonê xo qulotna ro, ala vaze se bî?’
Büyüksapık vano ‘qe...qe...qe...,pe...pe...pe...persmeke, ma.....ma...maaaa Qe...Qe...Qendîl ra yeeeeemmeee, na.....na....na....ma....’
Faris vano, ‘na simara, se kerd?’
Büyüksapık vano, nê...nê...nê...,hebêna xiravin kerdîme!
Hebê bîyo na fênd e. Çond reye eskerê tirkî şî, wast başur bijerê binê bandira xo, her tim tarve gurete û peyser cerayî ra. Nika Îran na raye cerebneno.
Xêra heqî ser na raye Osman Farisî ra perseno.
Tabî Faris kî aynî cuwav dano.
Se ke oseno, mavênê Kurdan de jûbîyayene hona tam nêvirajîya. Teqetê başurî heştê ra tepîya jû eskerakerdîso zar danê: Îranî ra vanê ‘zerar sîvîlan mede!’ Na jûbîyayene nîya. Dugela to vêsnenê, riznenê, no eskerakerdîs tewa nîyo.
No bar onca poşta qomî dero. Qomê Kurdîstanî onca karê sîyasetvanan keno, başur, bakur, rojava, kotî beno bibo.