Bi rojano ceniyê azadîwaşt yê Tirkiye û Kurdistan fina-onca serva kiştişê ceniyan meydanan de îsyan de yê. Qûrbana peynî wendoxa 2 serrî Özgecan Aslan a. Bado ke mektebê ci qediya Özgecan waşt bi mînîbus şiro keyeyê xo, la raştê îşkence, heriş û qetlîamê da how amê. Hîrê camêrdê ke wijdanê xo vinî kerd tecawizê Özgecan kerdî, peycoy ay derb kerdî û bahdê coy zî veşnay. Badê na biyayiş herkes persa sebebê na herîş keno?! Raştî zî sucdar kamo, sebep çiçîyo? E ke nê hîrê kesî cezayê giran bigîrê nê biyayişî dê biqediyê? Peyniya kiştiş, şîdet, tacîz û tecawizê ceniyan do bîro? M ana wehşet de sucê îxtidar, rolê polîtîka û zihnîyeta ci çinyo?
Kam se vano, senî emel keno wa bikero, ez vana; Qetlîama Özgecan û bi hezaran ceniyan netîceyê qisey, ziwan, fikir û polîtîkayanê Erdoğan’î, yê AKP biyê. Erdoğan’î jû partî û jû homet û sîstema ‘camêrdîn’ rona. Na sîstema Erdoğan’î de ceniyan rê ca çinyo. Her çî goreyê menfaatanê camêrdan o. Camêrdî ‘tecawiz’ zî bikerê, ‘bikişê’ zî, ‘pirodê’ zî înan rê ‘heq’o. Qanûnê Erdoğan’î wina-hinî yê. Çi ke fitratê AKP de zeypêbiyîna cenî û camêrdan çinyo. Fitratê înan de ‘xîzmetkarî, kolebiyîn yanî bindestiya ceniyan esta. Çima her serr kiştiş û şîdetê verra ceniyan beno vêşî? Çi ke camêrdî vatişanê Erdoğan’î ra, hiqûq û qanûnanê ci ra cesaret gênê. Çi ke Tirkiye de cezayê kiştişê ceniyan tecawizkerdişê înan çinyo. Verra ceniyan kam se keno ci rê rewa yo, heq o. AKP û serverê ci ceniyê ke keyeyê xo ra vejyenê ra tehamul nêkenê. Cok ra wazenê siyaset û hometî miyan ra tecrît bikerê. Çima Erdoğan hendayî behsa homara qeçik-domanan keno? Statuyê ceniyan tenya bi keye ra sînor kenê. Jew sermiyanê AKP werzeno vano ‘bi vengê berz hiwînayişê ceniyan nêbeno’, jew o bîn vano; ‘wa cenî çina-kincê ewna-wina xo ke rê’. Mahkemeyan de zî sewcî û hakîmê ci kesê ke ceniyan kişenê û tecawizê ci kenê ya beraat kenê, ya zî tenya cezayê sembolîk danê. Çima çi ke vanê ceniyan camêrdan tehrîk kerdo, cok ra ameyê kiştiş. Xo ra wexto ke jû cenî cayê de raştê şîdet yena polîs zey film herkes xo rê temaşe keno.
Tirkiye welatê do camêrdan o û bi qanûnanê faşîstîn yena rayra bedrin. AKP cinawir û qatîlan ra jû homet û sîstem rona. Û na sîstem de tenya cenî nê pêrokîn homet raştê tecawiz yena. Çi ke qanûnanê faşîstîn ser hometî de ferz kerdin tecawiz o. Polîtîkayê ke goreyê menfaatanê camêrdîn yenê ramiten tecawiz o. Fikir, felsefe û fitratê ke AKP xo rê esas gêno faşîstînê. Zihnîyeto ke Erdoğan’î camêrdan de rona nê qetlîaman dano viraştiş. Medîne Memi, Fadime Şanlı, Ayşe Paşalı, Arzu Civil, Serap Himmetoğlu, Alev Er û, û, û…. A ra heta Z bi hezaran cenî amey qetilkerdin, kancî kiştoxî cezayê do giran girot. Goreyê tayn îstatîstîkan dinya de homarê qetilkerdişê ceniyan kesê ke herbî de mirenê ra vêşî-jêde yo. Endî gerek herkes fehm bikero ke herbê tewr gird herbê ‘qirkerdişê cînsî’ yo.
Serva îsyan zaf sedemê ceniyan estê. Badê Özgecan zî xeberê kiştişê çend ceniyanê bîn zî amey. Raştî zî endî gerek cenî, rêxistin û sazgehê ceniyan midaxaleyê na zihnîyeta serdest ya camêrdîn bikerê. Serva nay zî gerek bi bi midaxalekerdişê îxtidar û polîtîkayanê ci bikerê. Gerek Tirkiye de endî dewrê da newî destpa bikero. Wextê destpakerdişê dewrê da demokratîk û azadîwaşt ame. Şarê Tirkiyeyî nay rewna ra heq kerdo. AKP ya ke wayrê zihnîyeta faşîstîn a serr şaran biya bela. Gune şarî xo AKP û dîktatorê ci ra bireynê.
Wext ame, gerek cenî û pêrokîn şarî îsyanê xo berz bikerê û welat dîktatör, tecawizkar û faşîstan ra bixelesnê-bireynê…