Tirkîya de vilabîyayişê Vîrûsê Koronayî domyeno û hetanî nika 168 kesê cuya xo dayê. Îqtîdarê AKP û MHPî zî her roj welatijan ra keyeyê xo de bimanê ser o veng dano la kedkarê ke mecbûrî bixebitê ser o zî çikêk nêkeno. Vera nê nêzdîbîyayişê AKP MHPî, Partîya Çep, pêroyina welatî de çalakîyê şermezarkerdişî ser o aşkereyêk da û Partîya Çep dîyar kerd ke welatijan do pacayê xo ra beyraqa sipî wa bielaqnê.
Partîya Çep aşkereya xo de destnîşan kerd ke Serekkomar Erdogan û Wezaretê Weşîye Fahrettîn Koca rêziknameyê qanûnî ke seba feydayê şarî hetanî nika nêviraştê, no ser zî çi heyfo ke kedkaran bêçare vejîyenê teber û xebityenê.
Kelmelê xida û pankî bêpere bibê
Partîya Çep destnîşan kerd ke ganî seba kedkaran nê waştişê lez bîrê cayê xo: “Kedkaran tewro kêm 14 rojê destûro bipere bêro dayiş, Fonê Sîgortaya Bêkarî tena seba kedkaran bêro şuxilnayiş. Karî ra vetiş û destûro bêpere bêrê qedexekerdiş. Hetanî Vîrûsê Koronayî biqedîyo, xizmetê ceryan, gazo xoza, awe û înternetî bêpere şarî ra bêrê dayiş. Welatijê ke îxtîcîya înan estê ra kelmelê pankî û xidayê binge bêpere bêrê dayiş. Nêweşxaneyê dewlete û taybetî, xizmetê weşîye wa şarî ra bêpere bidê.” MERKEZÊ XEBERAN