Hukmatê Herêma Kurdistanî 25ê teşrîna peyêna 2018î de qerar da ke partî û rêxistinê ke yenî îdarekerdiş fermîyetê înan çin î, ganî bêrî padayîş. No qerarî ra dima merkezê Hereketê Azadîye yê Komelê Kurdistanî ame padayîş û destûr nêdîyeno ke ti çalakîyêk pê bêro.
Nuştox û Rojnameger Şiwan Mihemedî dîyar kerd ke padayîşê merkezê Hereketê Azadîye yê Komelê Kurdistanî binpaykerdişê heqê merdiman o û wina va: “Hereketê Azadîye hêzêko çekdar nîyo û hêzêko medenîwaştox o. Qey Iraqî de destûr yeno dayîş, la tîya de destûr nîno dayîş. Padayîşê merkezan texrîbkerdişê demokrasî yo. Hêzê ke Kurdistan de serdest î, hîzbulla û hêzê leşkerî yê huzbulla yî. Dewleta tirkî çiqas hêzê kurdan yê Vakur û yê bînan bêveng bikera zî nêeşkena biresa netîceyêk. Kurd tena kurdê Vakur nîyî. Çar parçeyê Kurdistanî de kurd estî û ganî heminan reyde pê bikera.”
HEWLÊR