Semedê serkewtişê Kobanê firaz bikerî û paştî bidî awankerdişê Kobanê, roja 1’ê Teşrîne çar hetê dinyaye de bi seyan çalakî ameyî viraştiş. 1’ê Teşrîne Roja Kobanê ya Dinyaye ke hetê Yewitîya Ewropaye (YE) û Komîsyona Welatijanê Tirkîyaye (EUTCC) ra ameybî îlankerdiş, raya diyîn o ke bi eleqeyake gird rî bi rî mend. Ya ewil wexto ke sera bîn hêrişê çeteyanê DAIŞe Kobanê de ameybî şiknayîş virazyaybî. 2014’î de wexto ke çeteyanê DAIŞe hêrişê erjê merdimantî kerdî, hemverê înan des hezaran kesî vejyaybî raşteyan, waştbî ke ambargoya ser Kobanê bêro wedarnayîş.
Emserr hîrê roje bî
Vernîya newe ra awankerdişî de astengîya tewr gird Tirkîya bi xo ya. Îqtîdarê AKPe yew hetî ra semedê ke qezencê Rojawanî vero astengî bivirazo çeteyanê DAIŞe reyde hemkarî awan kena, heto bîn ra zî semedê newe ra awankerdişî de vîyartişê lazimîyan asteng kena. Goreyê zanayîşê ke organîzatoran ra ame girewtiş, emserr Roja Kobanê de 40’î ra vîşêr welatan de û bi seyan şaristanan de çalakî amey viraştiş.
Serra şi ra cîyayêr emserr çalakî hîrê rojan sero vila bî. Çalakî 31’ê Citmenge roja şeme dest pê kerd û heta 2’ê Teşrîne domyay. Her şaristanî de komîte, grube û rayvistişên cîya cîya çalakîyan ra rayvertî kerdî û no semedî ra zî çalakî raştê heman roje nêamey. Grubê ke semedê Kobanê projeyê mekteb û nêweşxane viraştî, semedê projeyanê xo hetkarîyê madî kom kerdî.
Raşteyeke hîra de bî
Emserr çalakî û şahîy Rojawanî ra heta Afganîstan û Pakîstan, rayna Ewropa, Afrîka, Amerîka û Avustralya yew erdnîgarîya hîra de virazyay. Nêzdîyê panc parzemînî çalakîyanê Rojawanî ra şahidî kerdî. Kobanê, Efrîn, Hasekê, Qamişlo, Dêrik, Amûde, Tirbespîyê, Rimêlan, Serêkanîyê, Şamî û rayna Kurdistano Vakur de zî emserr eleqeyake gird ame nîşandayîş.
Romaye ra heta Kabîl derg bî
Hetê humarî de tewr zaf çalakî Ewropaye de amey organîzekerdiş. Sifteyîn welatê Îtalya, Fransa, Îngîltere, Swîsre, Swed, Almanya û zafaneya Ewropaye de çalakî amey viraştiş. Rayna welatanê parzemînê Asyaye ra Hîndîstan, Pakîstan, Afganîstan û Japonya de semedê Kobanê çalakî amey organîzekerdiş. Parzemîna Avustralyaye ra zî welatê Zelandaya Newe de, Amerîka de zî nêzdîyê 18 şaristanan de û Afrîka de zî Tunus, Fas û sewbîna cayan de şar vejya raşteyan û semedê Kobanê paştîya xo nîşan day. Hetê nêy çalakîyan de semedê Kobanê hetkarîya komkerdişê pereyî ame kerdiş.