Kurdistanijan û dostanê ci, yê ke bi aşman mîjdanî pawitî, bi govend û zerweşî xelesnayişê Kobanê bimbarek kerdî. YPG bado zî dest bi hamleyê xelesnayişî dewan kerd û her roj bi desan dewî çeteyan ra kerdî pak. Badê na serkewtişê tarixî, welatijê ke goç bibî, ageyrayî û dest pa newe ra înşayê Kobanê kerdî. 


Hamleyê Rûbar Qamişlo

YPG badê Kobanê, 6ê Gulan’a 2015î de, kantonê Cizîr de verra çeteyanê DAIŞ, dest bi hamleyê Fermandar Rûbar Qamişlo kerd.Wextê zaf kilmî de, sûkê Til Berak, Til Hemis, Til Temir xelesnay û verê xo açarna Koyê Qizwan. Peyniyê xoverdayişî de, 21ê Gulan de Koyê Qizwanan jî çeteyan ra kerdiya pak. YPG sûkê Mebrûka û Silûk zî hedef girot û nê cayî zî çeteyan ra kerdî pak.


Serkewtişê Girê Spî

Badê xelesnayişê Silûk hinî çimê heme kurdistanijan açariyayî Girê Spî, bi nameyo bîn Til Ebyad’î ser. Qûwetê YPG-YPJ him hetê Kobanê û him zî hetê Cizîr ra şî Girê Spî ser, raya Girê Spî û Reqqa ser de resiyay pê. Badê wextekê kilmî, YPG û YPJ, bi lejkeranê Burkan El Firat’î ra piya Girê Spî zî xelesnay. Bi xelesnayişê Girê Spî hinî-endî kantonê Kobanê û Cizîr resiyayî pê. Na serkewtişa tarixî, verra hikûmeta dewleta tirk û DAIŞ darbeyê da gird bi.


Dewleta tirk çeteyan vist dewre

Dewleta tirk zey Kobanê, vinîkerdişê Girê Spî zî, zey binkewtişê xo hesibna. Cok ra çeteyê DAIŞ reyna-ancî vistî dewre. Peyniyê aşma Hezîran’î de çeteyê ke sînorê tirkiye ra ravêrdî, Kobanê de bi desan kesî kiştî, bi desanê ci kerdî dirbetin, kuçeyê Kobanê açarnay gola gonîn. Cok ra dewleta tirk verra YPG kampanya siyakerdin vist dewre û îdia kerd ke, YPG demografiyê Girê Spî vurneno. La belê Girê Spî de kurd, ereb, suryanî, tirkmen û pêrokîn îtiqat-baweriyan binê ewlekariyê YPG de, rayverînê xoser îlan kerd û kampanya dewleta tirk pûç veti.


Qûwetê Sûriye ya Demokratîk

Rojawa de peyniyê menga Cotmeh de, jû hamleya bîn dest kerd ci. 31’ê Cotmeh de bi rayverînê YPG de, Quwetê Suriye ya Demokratîk îlan bî. Bi îlankerdin ra piya, QSD dest bi hamleyê azadkerdinê Başûrê Hesekê kerd. QSD zereyê didi hefteyan de sûka Xatûniye û  Hol ke, cayê stratejîkê çeteyan ra xelesnay. Şaranê ke nê mintiqeyan de weşî kenê, bi kêfweşiyê da gird, quwetê QSD virarden kerdî.


Meclîsê Sûriye ya Demokratîk

8 û 9ê Kanûne de sûka kantona Cizîrê Dêrik de, jew kombiyayişê tarixî viraziya. Qora-reyna sifteyin mûxatabê meseleya Suriye, Rojawa de amey pêhet û meseleyê xo mûnaqeşe kerdî. Peyniyê kombiyayin de qerarê ronayişê Meclîsî Sûriye ya Demokratîk roniya.

Çeteyê ke dewleta tirk ra desteg gênê, verra nay kewtî hereket û 10ê Kanûne de sûka Til Temir de, 3 êrişê bombeyin viraştî. Netîceyê na êrişa gonîn de, 28 sivîlan weşiya xo kerdî vinî û nezdiyê 100 kes bî dirbetin. 


Verra Efrîn û taxa Şêxmeqsûd êrişî

Peyniyê aşma Mijdar’î de, çeteyê El Nûsra, Ehrar El Şam û DAIŞ yê ke dewleta tirk ra desteg gênê, êrişê Efrîn û mehleya-taxa Şêxmeqsûd ê Helebî kerdî. Quwetanê YPG zey cayanê bînan, Efrîn û Şêxmeqsûd de zî cewabê tûnî danê çeteyan.

Badê hamleya 30ê Cotmeh yê Hesekê, 23ê Kanûne 2015’î de, qûwetanê QSD, Başûrê Kobanê de 2. hamleya serbestî day destcikerdin. Çarçoveyê hamle de, qûwetanê QSD Bendaw û sûkeka Teşrîn çeteyan ra xelesna. Şiyayişê QSD kişta rojawayê çemê Firat de rameno. Qûwetê QSD gam bi gam nezdiyê sûka, ke çeteyan açarniyayo qerargeha xo, Reqa benê. Verpersiyaranê QSD aşkere kerdî ke, hedefê înan pêrokîn Rojawa û Sûriye çeteyan ra pakkerdin o.  


NAVENDÊ XEBERAN