Protestoyê 15ê Sibat

Kurdistanijan 15ê Sibat de, him Bakur û him zî Tirkiye de Komployê verra Rayverê Şarê Kurd Abdullah Ocalan’î yo mavên-dewletî protesto kerd. Quwetanê Tirk xeylê cayan de êrişê protestoyan kerd, 57ê ci qeçekî, 230 kesî kerdî binçim û nînan ra 59 kesî eştî zîndanan.


8ê Adarî ra heta Newroz

8’ê Adar Roja Ceniyanê Kedkar ê Dinya, heme sûkanê Bakur de bimbarek bi. Des hezaran ceniyê ke vejiyay meydanan, waştenê serbestî kerdî berz.Ceniyanê kurd Şiyayişê Ceniyanê Dinyayî rê rayverîn kerdî.

Newroza 20015î zî, açariya Newroza milyonan. Adirê sifteyin yê Newroza 2015î  Agirî-Bazîd de vistiya ci. Pêrokîn sûkanê Kurdistan de, kila adirê Newroz bî har û resya asmenan. Fînalê Newroz zî, zey her serr Amed de ame dayen. Amed de bi tewrbiyena milyonan, bimbarekîn açarniya Newroza Ocalan’î. Se hezaran bi jû fekî ra waştena serbestiya Rayverê xo berz kerdî. 


Weçînayişê 7ê Hezîranî 

Bakurê Kurdistan de, gureyînê do tarixî û muhîm weçînayişê 7’ê Hezîranî bî. HDP heme sûkanê Bakûr û Tirkiye de xebatê weçînayişî ramit û rastê eleqeyê gird ame. AKP zî dustê HDP, komê faşistî vistî dewre û verra HDP bi seyan êrişî viraştî. 18’ê Gulan de verra bananê HDP ê Adana û Mêrsîn, êrişê bombeyî viraziyay. Peynî de xeylê kesî bî dirbetin. HDP 30ê Gulan de Stenbol de bi mitîngê se hezaran cewab da êrişkaran. 5ê Hezîran de mitîngê Amed’î bi tewrbiyayinê se hezaran dest kerd ci. La belê AKP, bi destê çetanê DAIŞ, êriş kerd. Netîceyê êrişê bombeyî de 5 kesî şehîd kewtî û 416 kesî bî dirbetin.

Rixmê heme êrişan, HDP weçînayişê 7ê Hezîran’î de serkewtişê tarixî vist dest.HDP 80 parlementerî vetî û AKP Bakurê Kurdistan de, se ra 50 ra jêde reyanê xo kerdî vinî.


Weçînayişê 1ê Mijdarî 

Weçînayişê 7ê  Hezîranî, heme planê AKP xeripinay û xeyalê Erdogan’î welişnay.Ser nay AKP û Erdogan’î, netîceyê weçînayişanê 7ê Hezîranî qebûl nêkerd û raya weçînayişanê 1ê Mijdarî akerd. AKP destê çeteyanê DAIŞ, 20ê Tîrmeh de qezayê Riha Pirsûs de, verra Gencanê Sosyalîst yê ke waştî şirê Kobanê, komkiştiş viraşt. Vêşiyê 30 gencî şehîd kewtî û bi desan gencî bî dirbetinî.


Qetlîama Enqera

AKP bi destê çeteyanê DAIŞ, jû komkiştena bîn zî, Enqera de viraşt. 10ê Cotmeh de des hezarî azadîwaştî şî Enqera û waştişê haşitî ardî ziwan. La belê çeteyanê AKP, êrişê bombeyin viraştî. Vêşiyê 100 kesî şehîd kewtî û bi seyan kes zî bî dirbetin. Ser nê êrişan, HDP qerar girot ke, serva-qandê weçînayişê 1ê Mijdar, mitîngan nêvirazo. AKP serva weçînayişê 1ê Mijdar de, verniyê HDP bigîro, heme îmkanê dewlet seferber kerdî.

La belê HDP rixmê heme êrişan û astengiyan, 59 parlementerî vetî û bî partiya hîrêyin. AKP serniyê serra 2015 ra hetanî peyniyê serr bi êrişan cewab da wastenanê demokratîk yê şaran.

7ê Hezîran’î ra tepya, 5 mengan miyan de, 33ê ci doman-qeçekî, 258 sivîlî kişiyay. 190 banê HDP veşiyay û bi seyan siyasetmedarî tepişiyay.20 hemşaredarê DBP wezîfe ra amey dûr vistiş û înan ra xeylê erziyay zîndanan.

Zey her serr, 2015 de zî serraçarnayinê ronayinê PKK, bi coş û heyecanê gird bimbarek-pîroz bî. Bimbarekînan de, wastenê azadiyê Ocalan’î, selamkerdişê rayverînê xoser û berzkerdinê xoverdayişî vejiyê ravey.



NAVENDÊ XEBERAN