Dezgeyê kurdan KCDK-E, KNK, HDP, KCD û sewbîna xeylê dezgeyan bi wesîleya Roşanê Qurbanan mesajê pîrozkerdişî pare kerd. Dezgeyan bale antî zext, teda, neheqî û îşkenceyan ser û wina vatî: “Wa no roşan şarê ma rê aştî, azadî, biratî, demokrasî û edalet bîyaro. Ma sere de roşanê kurdan û yê heme şaran pîroz kenî.”
Ewro Roşanê Qurbanan o û no roşan xeylê cayan de yeno pîroz kerdene. Manaya roşanan aye ya ke merdimî pê bêrî, piştî bidî yewbînan, halê yewbînan ra fam bikerî, aştî û huzir komel de bivirazîyo.
Bi wesîleya Roşanê Qurbanî Dîvanê Hemserekîya KCDK-E, Kongreya Neteweyîya Kurdistanî (KNK), Partîya Demokratîke ya Şaran (HDP) û Kongreyê Komelê Demokratîke (KCD) îzehetêko nuştekî dayî û roşananê şaran pîroz kerdî.
KCDK-Eye mesajê xo de vato ‘polîtîkayê qetilkarî yê AKPyî roja roşanî de zî dewam kenî’ û wina domnayo: “AKPyo ke wayîrê zîhnîyetê DAIŞî yo, destûr nêdano ke şarê ma roşanê xo pîroz bikero. Erdogano sextekar sere de Şengal, Başûr û Rojawanê Kurdistanî de û xeylê cayanê bînan de hêrişê kurdan keno. Erdogan û dewleta AKPyî do vera muxalîfan de binkewo. Ganî şarê ma bi wesîleya roşanî yewîya xo awan bikero û piştîdayîşî zêde bikero. Wa no roşan şarê ma rê aştî, azadî, biratî, demokrasî û edalet bîyaro. Ma sere de roşanê kurdan û yê heme şaran pîroz kenî.”
Wa huzir û azadîye bêrî nê erdan
KNKyî mesajê xo de vato ‘ma nê roşanî rewşêka îstîsnayî de derbaz kenî’ û wina dewam kerdo: “Ewro Vakurê Kurdistanî de hêrişê şarê ma ser o dewam kenî. Dewe û bajarê ma yenî rijnayene, tebîetê ma yenî talan kerdene. Rojawan de şarê ma têkoşînê azadîye domneno. Başûr û Rojhelat de têmîyanî û hêrişî dewam kenî. Şar û şerwanê ma vera hêrişan de bi hawayo qehremanî xover danî. Yê ke xo rayberê muslumanan vîneno, hêrişê şarê ma keno û qetlîyaman virazeno. Ma bi wesîleya Roşanê Qurbanan, sere de roşanê hepsîyan, şerwananê azadan, şarê kurdan û heme alemê îslamî pîroz kenî. Ma hêvî kenî ke wa roşanê ameyeyî bibî wesîleya aştî, huzir û azadîye.”
Ganî ma hêvîya xo girde bikerî
HDPyî zî roşanê şaran pîroz kerd û îzehetê xo de wina vato: “Vindetişê cinîyan, kedkaran, tebîethêzan û pawitoxê heqê merdiman no roşnan de zî hêvî dano ma. Ma hêvî kenî ke ameye de do rojê ke zerrîya keyeyan nêveşena, hîsê wijdan û edaletî tede estî bêrî. Wa ewro bibo wesîleya roşanê ke doman û ciwanî nêmirenî, cinîyî raştê şîddetî nînî û ti kes ca û warê xo ra koç nêkeno. Ma na çarçewa de roşanê herkesî pîroz kenî.”
Wa goreyê ruhê ci bêro pîroz kerdene
KCDyî zî mesajê xo de roşanê kurd û heme alemê îslamî pîroz kerdo. KCDyî dayo zanayene ke ê sere de roşanê kurdan û heme alemê îslamî pîroz kenî û wina vato: “Roşanî her serre seyaya şer, pêrodayîş, îşkence, qetlîyam, rijnayîş û surgunan de derbaz benî. Ganî ma roşananê xo goreyê mana, ruh û cewherê ci pîroz bikerî û ancax wina bimana beno. No zî ancax bi heq, edalet, seyyewbînanî, demokrasî, azadî, huzir û îstîkrarî bêro cuyayene, mumkin o. Ma hêvî kenî ke nê zulmî ra xelas bibî û ma roşanê heme alemê îslamî pîroz kenî. “
MERKEZÊ XEBERAN