Parlamenteranê HDP’yî bi waştişê wedartişê tecrîdê serê Rayberê Şarê Kurdî Abdullah Ocalanî dest bi nobete kerde.
Parlamenteranê HDP’yî banê KDC’yî de semedê paştîdayîşê grevê vêşanîye yo ke semedê wedartişê tecrîdê serê Ocalanî yeno viraştene, vizêr dest bi çalkîya nobete kerde.Leyla Guvene bi telekonferansî çalakwanan de qisey kerd.
Çalakîya ke her roje do bi di parlamenteran bêro domnayene hetê parlamenteranê HDP’yî Dersim Dage, Salîha Aydenîze, Semra Guzele, Ridvan Turan, Musa Farîsogullari û Tulay Hatîmogullari û namzedê hemşaredarîye yê Bajarê Girdî yê Amedî Selçuk Mizrakli ra ameye destpêkerdene.
Waştişê Guvene waştişê ma yo
Dersim Dage da zanayene ke ê semedê paştîdayîşê grevê vêşanîye yo ke rayberîya Guvene de ameyo destpêkerdene, nobete tepişenê.
Tulay Hatimogullari zî Guvene sey îradeyê şarê Kurdî name kerd û vat ke Guvene semedê wedartişê tecrîdê serê Birêz Ocalanî dest bi çalakîye kerde. Guvene biheq a û ganî tecrîd bêro wedartene.
Ridvan Turanî zî balê ante muhîmîya girevê vêşanîye ser û vat ke tecrîdo ke Birêz Ocalanî rê yeno bicaardene, heme vengan bînan ê ke hetê îqtîdarî de nêyê rê yeno bicaardene. Coka ganî her kes vera naye bivejîyo.
Turanî veng da hukmatî ke tecrîd wedaro û va: ‘‘Waştişê Guvene waştişê ma yo, ganî tecrîd bêro wedartene. Semedê wedartişê tecrîdî do çalakîyê ma dewam bikerê. Eşkerayî ra dima çalakîya nobete ameye destpêkerdene.
Rayîrê ma bizehmet o, a ma do ser bikewê
Grevê vêşanîye yê hemsereka KCD’yî û parlamentera HDP’yî Leyla Guvene semedê wedartişê tecrîdê serê Rayberê Şarê Kurdî Abdullah Ocalanî ameyo destpêkerdene roja 86’ine de yo. Leyla Guvene zî bi telekonferansî çalakwanan de qisey kerd.
Guvene vat, “Mîyanê faşîzmî de şima vanê “qral rût o” û têkoşînê xo domnenê. Têkoşîn û karê şima zereyê şarî ra yeno û reyna şino reseno şarî. Nêzana, serê weçînitişî ra çiqas wext derbaz bi, la şima hemeyan rê serkewtiş wazena. No rayîr çiqas bizehmet beno wa bibo ma do ser bikewê.”
Nobeta şima ya ucayî zaf hêja ya
Leyla Guvene peynî de vat, “Nobeta şima ya ucayî zaf hêja ya. Ma bi serran cehd kerd ke bêrîme têhet de û pîya cayêk de vindîme. Ma nika pîya yîme. Birêz Ocalan nê helwestî zaf hêja vîneno. HDP û fîkrîyatê HDP’yî dîyarîya tewr hêca ya ke şarê ma rê ameya kerdene. Tirkîyeya tam demokratîke û Kurdistano azad mimkin o. Bîye gama destpêke, nêzdîyê 300 hevalê ma hepisxaneyan de bi grevê vêşanîye na daye destpêkerdene.”
AMED