Seba nûmayîşê Grevê Veyşanî yê tepişteyanê sîyasî yê Girotxaneyanê Tirkîye jew vengdayîş zî DBP ra ame. Merkezê Pêroyî yê DBP veng da teşkîlatanê xo yê qeza û sûk ke bi lezîn bikewê hereket û nûmayîşan virazê.
Îzahatê Merkezê Pêroyî yê DBP de vajîya ke, “şert û mercê girotxaneyan,15'ê Temûzî ra tepya bî giran. Zext, îşkence û kerdenê xirab tepişteyan ra yenê ferzkerdiş, heqê mordeman yenê binlingkerdiş, hewl yeno dayen ke îradeyê tepişteyan bîro şikitiş.
Şerê îradeyî danê ramiten
DBP vist vîrî ke hemverê polîtîkayanê bêrîmetkerdişî û teslîmgirewtişî, ke AKP zerre û teber de ferz kena, nezdîye di aşmîyo zindanan de tepişteyê Kurd û dostê înan, şert û mercanê tewr giran de, bi bedenê xo şerê tewr gird ê îradeyî danê ramiten.
Îzahatê Merkezê Pêroyî yê DBP de ame vaten ke xeta xoverdayîşî yê sîyasetmedar û tepişteyanê Kurd ke bi serrano her qonaxa têkoşîna serbestîye de danê ramiten, Mazlûm û Kemalan ra heta ewro bi desan girotxaneyan bedenê xo dayo ver merdişî, hemverê polîtîkayanê teslîmgirewtişî, wezîfeyê xo yê bi heybet û bi rûmet her tim cardîye ca.
Qonaxa talokeyî
DBP vist vîrî ke sîyasetmedar û tepişteyê Kurd ê ke hêsîr ameyê girewtiş no 54 (vizêr) rojîyo ke, seba wedarnayîşê tecrîda ser Rayverê Şarê Kurd Abdullah Ocalan’î û peynîardîşê kerdenanê rûmetşikitiş yê girotxaneyan grevê veyşanî de yê.
Îzahatî de hayr ancîya ser rewşê tepişteyanê Girotxaneyê Şakranî ser û wina vajîya: “Rewşê tepişteyanê Girotxaneyê Şakranî qonaxeke talokeyî de ya. Nika ra xêlê tepiştey qonaxê talokeyî ra ravêrenê. Eke wayîrê nûmayîşa tepişteyan nîro vejîyayîş, beno ke netîceyî ke qet nînê waşten biqewimê. Ganî teşkîlatê ma yê sûk û qezayan, bê ke vinderê bikewê hereket û çalakîyê demokratîk virazê. Ganî nê çalakî heta bica ardişê waştenanê embazanê ma yê tepişteyan dewam bikerê.”
ANF/AMED