PDK ma rût û repal verda

Serra 2014 de çeteyanê DAIŞî hêrişê Şengalî kerdbî û wextê hêrişan de pêşmergeyê PDKyî pawitişê Şengalî nêkerdbî û bi no hawa vernîya qirbîyayîşê êzidîyan akerdbî. Rayberê Şarê Kurdî Abdullah Ocalan hîna hêrişê DAIŞî ra ver wextê pêvînayîşan de dîyar kerdbî ke îxtîmalê hêrişan esto û ganî Şengal bêro pawitiş. 3 PKKyî yê ke seba amadekarîya pawitişî şîybî Şengal, hêrişê çeteyan ra ver hetê PDKyî ra ameybî tepiştiş û dima ra hêrişê çeteyan dest pêkerdbî. Babete ser o Zerdeşt Derweşo ke 3 PKKyîyan ra yew o, qisey kerd.

Derweşî da zonayen ke o 2013 de seba xebatê ciwanan derbazê Şengalî bîyo û bi nameyê TEVDA xebatê xo domnayêne. Derweşî dîyar kerd ke PDK heta ke dest ra ameyêne xebatanê ma asteng kerdêne û wina dewam kerd: “PDK polîtîkayanê zext û tedayan meşnayêne. Her roje wesayîtêk ke aydê PDKyî bî, vernîya dezgehê ma de vindetêne û nameyê kesê ke ameyêne hetê ma girewtêne. Şîyêne keyeyanê nê kesan û înan tehdît kerdêne. Çiqas waştêne asteng bikerî zî nêşînayêne têkilîya ma û şarî biqerfnî. PDKyî nêyî hezm nêkerdêne.” 

Seba êzidîyan fetwa vetî 

Derweşî dewamê qiseykerdişê xo de hayr ant rastîya Şengalî ser û da zonayen ke nufûsê Şengalî nizdîyê 700 hezar bî. Ma 2014 de Roşanê Çarşema Sûrî pîroz kerd. Fermanî ra 4 aşmî verê bî.  Derweşî da zonayen ke weçînayîşo ke PDK têk şî ra dima Rabîa de 4 êzidîyê ke karkerîya zîretî kerdêne ameyî qetilkerdiş û şar zanayêne ke no karê PDK yo. Derweşî vist vîrî ke nê hedîseyî ra dima bi seyan êzidîyî Rabîa ra vejîyayî û ameyî Şengal û wina dewam kerd: “Mûsil de fetwaya ‘kura de êzidîyî bêrî dîyayîş, ganî bêrî kiştiş’ amebî vetiş. Wendekaran ra bigîr heta karkeran xeylê kesî agêrayî Şengal. Wexto ke DAIŞ dormeyê Mûsilî girewt, PDKyî nêverdayêne ke êzidîyî Şengal ra bivejyî. Şarî ra vatêne ‘tîya de 6-7 hezar pêşmergeyî estî, ma eşkenî şima bipawî’. Telaferî ra bi hezaran şîîyî vera xo dayî Şengal. Her çiqas ke mabênê şîî û êzidîyan baş nêbî zî, êzidîyî berê keyeyanê xo heta peynî înan rê akerd.” 

PDKyî ma rût û repal verda 

Derweşî qiseykerdişê xo de va ‘Wexto ke DAIŞ kewt Mûsil, leşkerê Îraqî heme sîlehanê xo verdayî û remayî’ û wina domna: “O wext tayê ciwanê êzidîyî şîyî sîlehanê înan girewt û ardî. Labelê wexto ke DAIŞ vera xo da Şengal, Asayîşê PDKyî sîlehan destê şarî ra girewtî û heto bîn ra yew bi yewe keyeyan gêrayî û sîlehanê şarî destê înan ra girewtî. Ti nika şarî ra bipersî, şar vano ‘PDKyî ma rût û repal vernîya vergan de verda’. O wext ma seba ke herêmêka biewle peyda bikerî ma 3 embazî dormeyî kişf kerdênê û ma hetê hêzê asayîşê PDKyî ra ameyî tepiştiş. Her çiqas ke înan ma baş şinasnayêne zî ma bi endamê DAIŞî bîyayîşî sucdar kerdî. Helbuk înan mi baş şinasnayêne; çimkî verê cû ez hetê înan ra tepişîyaybîya.” 

Îşkenceyê êzidîyan kerdî

Zerdeşt Derweş’î day aşkere kerd ke wexto ke nasnameyê înan dayî înan û iyê dê serbest biameyêne veradayîş, a vîste de mesajêk ame telefonê pêşmergeyan û nasnameyanê înan reyna ci ra girewtîyanan û destê ci kelepçe kerdîye. Derweş’î vist vîrî ke çimanê înan ver de îşkenceyê êzidîyê ke înan reyde têkilî de bîy kerdêne û peynîya qiseykerdişê xo de wina va: “Dima ra mi tewqîf kerdî û berdî Duhok. Wexto ke ma hepis ra vejîyayî, heme çîyî bedilîyaybî. Şar hema zî remayêne. Tena Koyê Şengal destê ma de mendbî û halê şarî perîşan bî. Ma 30 embazî bîy û DAIŞ seba ke cayê ma zî bigîro bi sîlehanê giranan hêriş kerdêne. Ma bi xoverdayîşêko muazzam vera hêrişanê DAIŞî de vindetî. Her çiqas ke goreyê hişyarîyê Rayberî ma erey mendbî zî ma vernîya qetlîamî girewt. Gerîlayê kurd tîya de erdê ke seba merdimîye dergûşî kerdbî, pawit.”