Di rojî verê parlamentoyê Başûrê Kurdistanî ra 2 parlamenterê Tevgerê Goranî û Komala Îslamî hetê asayîşê ke girêdayeyê PDK yî ra ameyî tepiştiş û dima ra serbest ameyî veradayîş. Merdim eşkeno vajo ke nê pratîkê PDKyî dalpeya peynî ke bîye sebebê ser de şîyayîşê bardaxe. Çimkî verê cû zî pratîko ke hetê PDKyî ra ame nîşandayîş qet baş nêbî.
Çend rojî verê Serekwezîrê dewleta tirk Bînalî Yildirimî bi heyetêk şî Başûrê Kurdistanî û ewja de PDK û hukmatê Îraqî zîyaret kerd. Merdim eşkeno vajo ke zîyaretkerdişê înan yê Yildirimî çîyêko normal o. Labelê wexto ke merdim hedefê zîyaretî ra ewnîyeno, o wext merdim fam keno ke çîyêko normal nîyo. Pêvînayîşê Serekê PDKyî Mesut Barzanî û Yildirimî peynî bî, her di vejîyayî vera çapemenî û îzehet dayî. Wextê îzehetî de Serekwezîrê dewleta tirk Bînalî Yildirimî hetê Mesut Barzanîyî de va ‘Ma zanî ke PKK û PYD terorîst î.’ No vatiş tim fekê îdarekaranê hukmatî ra yeno vatiş, labelê na rey no vatiş hetê Mesut Barzanîyî de ame vatiş û Barzanîyî zî vera nê vatişî de bêveng mend.
Xora bêxera nê vatişî çend hedefê bînî yê pêvînayîşî estbî. Înan ra yewe Şengal ra vetişê PKKyî bî. Yeno zanayîş ke Tirkîya zî, PDK zî wazenî ke PKK Şengal ra bivejîyo. Xora verê cû no waştiş hetê Neçîrvan Barzanîyî ra bi hawayo ‘Ya PKK Şengal ra vejîyeno, yan zî ma bi zor vejenî’ amebî ziwan. PDK nê nizdbîyayîşê xo reyde fikrê xo yê vera yewîya neteweyî de zî aşkere kerdbî. Xora no vatiş vera vengdayîşo ke KCKyî seba viraştişê yewîya neteweyî kerdbî ra dima de amebî dayîş. Yanî PDK vera yewîya neteweyî de vindetişê xo nîşan da.
Hedefo bîn yê pêvînayîşî zî vera PKKyî de meşnayîşê polîtîkayê çinkerdişî yo. Yeno zanayîş verê cû hem hetê Wezîrê Karê Zereyî Suleyman Soylu, hem hetê Serekwezîr Bînalî Yildirim û hem zî hetê Serekkomarî ra ameybî vatiş ke no zimistan do vera PKKyî de operasyonê girdî bêrî viraştiş. No pêvînayîş raştîya xo de seba awankerdişê bingeyê operasyonî ame viraştiş. Xora roja ke Bînalî Yildirim û heyetê ci şîyî Başûr, teyarayê dewleta tirk dewanê dormeyê Qendîlî ser de bombayî varnayî û netîceyî de heywan û bexçeyê dewijan zirar dîyî. Raştîya xo de no mesajêk bî; roja ke heyet şono Başûr, Qendîl ser de hêrişê bombeyinî virazîyenî. No çîyêko normal nîyo, çimkî vera nê bombekerdişî de hetê ti îdarekarê Başûrî ra reaksîyon nêame nîşandayîş.
Sey ke mi destpêka nuşteyî de zî va, PDK nika zî dest eşto tepiştişê parlamenteran. Di rojî verê Hewlêr de asayîşê ke girêdayeyê PDKyî parlamenteranê Tevgerê Goranî û Komala Îslamî tepiştî û dima ra serbest veradayî. Merdim wexto ke nê pratîkê PDKyî ra ewnîyeno, vîneno ke ti cîyayîya PDKyî AKP ra çin a; çimkî hukmatê AKPyî Vakurê Kurdistanî de hemserek û parlamenterê HDPyî tepiştî û eştî hepisxaneyan.
PDKyo ke verê cû zî bi pratîk û vatişanê xo xeylê reyan vera yewîya neteweyî de vindetişê xo nîşan dabî, bi nê pratîkê xo yê peyên yewna rey nîşan da ke nêwazeno yewîya neteweyî bivirazîyo. Eke yewîya neteweyî bivirazîyo, o wext do menfîetê înan bidekewo tehlukeyî.