Nêweşxaneyê Şaran yê Qendîlî serra 2012 ra nata bêpere xizmet dano nêweşanê herêma Qendîlî û dormeyê ci. Nika nêweşxane bîyo hedefê PDKyî. PDK 9 aşmî yo ke derman nêdano nêweşxane û wazeno ke fermîyetê nêweşxaneyî wedarno. Babete ser o Dr. Medya Avyane û nêweşî qisey kerdî.
Dr. Avyane qiseykerdişê xo de wina va: “Dormeyê nêweşxane de 62 dewî estî. No proseso krîzin de heta ke destê ma ra yeno ma xizmet kenê û dermanan danî şarî. Ma vîşerê amelîyatan tedawîyê her tewir nêweşîyan kenî û nêweşanê xo taqîp kenî. Ma seba ke nêweşxane bibo fermî, zaf têkoşîn da. Wezîrê Weşî wazeno ke fermîyetê nêweşxaneyî wedarno. Ma na rewşe qebul nêkenî. Çimkî leşker û kesê sîyasetmedarî nêweşxane ra feyde nêvînenî, şar vîneno. Kesê ke nêeşkenî derman bigîrî, yenê tîya. Wa reaksîyonî bêrî nîşandayîş.”Heseno ke nêweş o, wina va: “No nêweşxane xizmet dano kesê sivîlan. Ma na rewşe qebul nêkenî. Ganî hukmat dermanan bido.” Nêweşan ra Mihemedî zî bale ant lazimîyê nêweşxaneyî ser û wina va: “Wa PDK fermîyetê nêweşxaneyî nêwedarno. Nêweşxane xizmet dano kesê sivîl û feqîran. Ganî derman bêro dayîş.”
Çi zirarê ci esto?
Nêweş Bes Husenî zî va ‘wa fermîyetê tîya nêro wedernayîş’ û wina dewam kerd: “Hukmat herinda ke hetkarî bido, wazeno ke fermîyetê tîya wedarno. Çi zirarê nêweşxaneyî hukmatê rê esto? Şar tîya ra xizmet gêno.”Tewr peynî nêweşan ra Nesrîn Osmane wina va: “No nêweşxane bêpere xizmet dano. Şar tîya de tedawî beno. Ma veng danê hukmatî ke wa fermîyetê tîya nêwedarno.”
DERYA KEJE/BERFÎN BAGDÛ / ANF / QENDÎL