Masewanî verê ra heta nika sey kulturê pî û kalikan ameyo roja ma ya ewroyên. Zaf gureyê kehenî estê ke heta ewro ameyê. Nika domanê pî û kalikan gureyê kehen yê tarixî domnenê û pê gureyê pî û kalikê xo debara xo kenî.
Nika zî bajarê Çewligî de gureyê pî û kalikan yeno domnayîş. Masegirê dewijê dewa Çeltîksuyu yê Çewligî ke awa Germîk Kurşunî de maseyan tepişenî. Dewijî pî û kalikanê xo ra nata tîya de masewanî kenî û ekîbê masegiran awan kerdî. Sahdullah Guda (33) û Selahattîn Goyukî (36) ke qijekîya xo ra dewe de masewanî kenî, qisey kerdî.
Lazimîya ma bi dewlete çîn a
Gudayî va ‘ma kalikanê xo ra gureyê masewanî musayî’ û wina qiseykerdişê xo wina domna: “Ma wazenê ke gureyêk ma bibo. Ma şinê kura berî ma ser de yenê padayîş. Dewlete gure nêdana ma. Xora polîtîkaya dewlete zî dîyar o, hetgirê xo gênî gure. Yê ke waştişê dewlete nîyarê ca, înan rê çi nan esto û çi zî awe esta. Dewlete gure nêdo zî ma do pê derfetanê xo debara xo bikerî. Dewlemendîya herra Kurdistane zêde ya. Hemd Homa ra lazimîya ma bi dewlete çin a.”
Sibayî ra vejîyenê rayîr
Selahattîn Goyukî zî wina va: “Ma hewte de 5 rojî maseyan tepişenî û ma pê rotişê maseyan debara xo kenî. Ma kîloyê maseyan 7 TLyî ra roşenê û rojane ma 50 yan zî 100 TL pere qezenc kenî. Ma heme sibayî saet 4 de pîya vejîyenê rayîr. Sibayî seba ke serd o maseyî zaf î û bi hawayo lez yenî tepiştiş. Wexto ke roj bivejîyo germ beno û mase vila benê. Ma herinda ke şinê bajarî Tirkîya de xebetîyenê, ma tîya de herra xo ser de eşkenê debara xo bikerî. Ma dewlemendîya herra xo ra feyde vînenê. ”
DÎHABER / ÇEWLÎG