Vilabîyayîşê janê vîrusê Korona ra dima Tirkîya de hewteyê vîyarteyî de qedexeyê vejîyayîşê teberî ame îlankerdene. Hetê bînî ra qedex çin bo zî vengdayîşê 'keye de bimane' dewam kenê. Rêxistinê Xelisîyayîşê Cinîyan ra Nûpelda Çelîk qedexeyê vejîyayîşê teberî û kampanyaya 'keye de bimane' yê îqtîdar ercnayî. Nûpelda vat: ''Vengdayîşê 'keye de bimane' seba her kesî nîyo. Karker û xebatkarî neçare yê ke bixebitê. Peynîya hewteyî de 31 şaristananê pîlan de qedexeyê vejîyayîşê teberî ame îlankerdene. Sermaye seba karkeran destûrê taybetî gêna û peynîya hewteyî de zî karkeran dana xebitnayene. Tecawuz, tacîz, şîdet û xizanîya zereyê keyeyî hetê hukmatî ra nênê dîyene, eşnawitene. Cinîyê ke neçarîye ra keye de manenê hem hetê camerdan ra maruzê şîdetî benê, hem ewnîyenê domanan, kokiman û camêrdan. Cinîyî nê prosesî de di qatî maruzê teda yenê. Cinîyê karker-kedkarî zî maruzê talankerdiş û wêrankerdişî manenê. Ma medyaya komelkîye de vînenê ke nê rojan de cinîyî zêdêr yenê qetilkerdene. Ganî hukmatî na rewşe verî ra bidîyêne û vera ci tedbîrî bigirewtêne. Pê qanûnê înfazî xeylêk tecawuzkar, kiştox û îstîsmarkerî vera dîyayî. Îqtîdar herinda he seba cinîyan tedbîr bigêro cinîyê ke şîdet vînenê gêrenê 155 û polîsî înan rê vanê 'Nê wextê vîrusî de ma nêeşkenê şima reyde meşxul bibê.' Verî ke dest nîya şaredarîyanê kurdan ser dezgehê cinîyan estbî la qeyûmî nê pêro girewtî. Ma reyna venga xo ber kenê. Ver vîrusî, vera şîdetê camêrdan ma paştî bidê yewbînan û bi nê hawayî xo bixelisnê. Taxan de ma paştdayîşê cinîyan, komunê cinîyan awan bikerê û pawitişê birêxistin xurt bikerê.'' ENQERE