Sere de Almanya, Fransa, Hollanda û Avusturya de û xeylê cayanê bînan de çalakîyê şermizarkerdişê tecrîdî ameye viraştene û çalakîyan de azadîya Rayberê şarê Kurdî Abdullah Ocalanî ameye waştene. Çalakgêran bêvengîya Ewropa şermizar kerde û waştî ke wa herkes vera tecrîdî de bivinderî.
16ê êlula 2016î ra nata Rayberê Şarê Kurdî Abdullah Ocalanî ra ti xebere nîna girewtene. Kurdî û dostê kurdan etirîyenî. Demêko derg o ke bitaybetî Ewropa de çalakîyê şermizarkerdişê tecrîdî yenî viraştene û azadîya Ocalanî yena waştene.
Na çarçewa de xeylê bajaranê Almanya, Fransa, Hollanda û Avusturya de semedê azadîya Rayberê Şarê Kurdî Abdullah Ocalanî çalakîyî ameyî viraştene. Bajarê Frankfurtî yê Almanya de rayberîya Civaka Azad de xeylê kurdîstanijî bi posteranê Ocalanî vejîyayî kuçeyan. Çalakîkeran bi rayîrraşîyayîşêk û mîtîngêk tecrîd protesto kerd.
Paytext Berlîn de Meclîsê Şarî yê Berlînî û Meclîsê Cinîyan yê DEST DANî çalakîyêk organîze kerde. Qiseykerdişan de ame vatane ke Ocalano ke sey Mandela û Gandîyî rayberêk o, ganî gamêk cuwa ver serbest bêro veradayene.
Pêroyîya Almanya de çalakîyî
Bi heman waştişî Hamburg de çalakîyêk ameye viraştene. Bajaranê Bremen û Kîel ra zî kurdîstanijî tewrê ci bîyî û bi posteranê girdan yê Ocalanî dîqet ant tecrîdî ser. Çalakîye de Parlamenterê Partîya Çepî yê Hamburgî Martîn Dolzerî qisey kerd. Dolzerî tecrîdo ke Ocalanî ser o esto, sey sucê merdimîye hesibna û waşt ke wa cade bêro wedartene. Bajarê Darmstadtî de seba azadîya Rayberê Şarî Kurdî Abdullah Ocalanî rayîrraşîyayîşêk ame viraştene. Çalakîkeran bi silogananê ‘Es lebe Ocalan - Bicuyo Ocalan’, ‘Freîheît fur Ocalan - Ocalanî rê azadîye’ vilawekî vila kerdî.
Bêvengîya Ewropa ame şermizarkerdene
Stuttgart de bi hezaran kurdîstanijî vejîyayî meydanan û bale ante tecrîdê Îmralî ser. Qiseykerdişan de polîtîkaya tecrîdî û bêvengîya Ewropa ameyî şermezarkerdene û azadîya Ocalanî ameye waştene. Saarbrucken de kurdîstanijan û dostanê ci semedê protestokerdişê tecrîdî çalakîyêk viraşte. Çalakîkeran hukmatê Almanya ra waşt ke wa vera tecrîdî de bivinderî.
Freîburg de bi çalakîyêk tecrîdê Îmralî û bêvengîya Ewropa ameyî protestokerdene. Çalakîkeran bi sloganan Ocalanî rê heskerdiş û giredayîşê xo ramojnayî û waşt ke wa gamêk cuwa ver tecrîd bêro wedartene. Kassel de zî kurdîstanijî û dostê ci meydanan de semedê azadîya Ocalanî qîrayî, polîtîkaya hêrişkare ê Tirkîya şermezar kerde û welatanê Ewropa ra waşt ke wa vera naye de bêveng memanî.
Sozê berzkerdişê têkoşînî dîya
Bajarê Montpellîerî yê Fransa de zî tecrîdo giran ke Ocalanî ser o yeno domnayene ame şermezarkerdene. Çalakîkeran derheqê felsefeya Ocalanî û tecrîdî de vilawekî vila kerdî. Paytextê Avusturya Vîyana de zî semedê şermezarkerdişê tecrîdî çalakîyî bêmabên dewam kenî. Vizêr zî bi çalakîyêk azadîya Ocalanî ameye waştene. Bajarê Grazî de zî bi çalakîyêk tecrîd ame protestokerdene û sozê berzkerdişê têkoşînî ame dayene.
Bajarê Den Haagî yê Hollanda de zî bi çalakîyêk tecrîdo ke serê Ocalanî de yeno domnayene ame şermezarkerdene û ame vatene ke heta azadîya Ocalanî çalakîyê kurdan do bêrî domnayene.
ANF / BRUKSEL