Gelek partiyên siyasî û parlamenterên Holandayî der barê desteserkirina şaredariyên Amed, Wan û Mêrdînê de pêşnûmapirsek pêşkêş kirin. Muxatebê wê jî Wezareta Karê Derve ye.
Ji Partiya Sosyalîst Saadet Karabûlût ji xwediyên înîsîyatîfê ye û Partiya Demokrat a Xiristiyanan, Partiya Reformê ya Civakî, Partiya Keskan, Partiya Karker, Partiya Demokrat û PvdD jî mohra xwe li bin pêşnûmapirsê daniye.
Hûn vê desteserkirinê qebûl dikin an na ?
Di pêşnûmapirsê de wiha hate gotin:
Haya we jê heye ku li başûr rojhilatê Tirkiyeyê şaredarên bi rengekî demokratîk hatin hilbijartin careke din ji wezîfeyê hatin dûrxistin û li şûna wan qeyûm tayîn hatin kirin?
Hûn dikarin piştrast bikin ku ji sala 2016’an û vir ve nêzî 100 şaredarên HDP’î li Tirkiyeyê ji wezîfeyê hatine dûrxistin û li şûna wan qeyûm hatine tayînkirin? Eger ev ne rast be, hingî rastî çi ye?
- Rêxistina Şopandina Mafê Mirovan ragihand ku dûrxistina ji wezîfeyê ya nûnerên mirovan êrişeke tund e ku li dijî demokrasiyê hatiye kirin. Hûn jî tevlî vê nêrînê dibin? Gelo mafên siyasî tên binpêkirin?
- Hûn amade ne ku girtina nûnerên gel ên hilbijartî bi rengekî eşkere şermezar bikin? Eger na, çima?
- Hollanda û Yekîtiya Ewrûpa ji bo hurmetê nîşanî pîvanên demokratîk bidin di nava hewldaneke çawa de ne?
- Pêkanîna van kiryarên antî-demokratîk wê tesîreke li têkiliya bi Tirkiyeyê re bike?
Biryara çalakiya hevpar
Wekî din gelek sazî û rêxistinên li Hollandayê biryar da ku li dijî desteserkirina îrade û demokrasiyê çalakiya hevpar bikin. Çalakî wê Şemiyê saet 15:00 li meydana Dam a li Amsterdamê pêk were.
ANF/DEN HAAG