Rojnamegerîya kurd peyniyê seserra 18. de destpa kerd. O çax hardê Anatolya û Mezopotamya bin hukmê Împaratorîya Osmanijan de bî. Rojnameyê sifte yê kurdan ‚Kurdistan zî surgun de welatê Afrîka Misir de destpa weşan kerd. Ronayoxê ‚Kurdistan Mîkdad Mîdhad Bedîrxan û birayê ci Abdûrrahman Bedîrxan serva ke rojnameyî Stenbol de vejerê Paşayê Osmanijan rê çend reynî serpirodayiş kerd. La no waşten nêame qebûl kerdiş. Mîkdad Bedîrxan’î emelê vetişê rojnameyî wina ardbi ziwan: „Endî roja ewroyîn de pêrokîn qewimyayişan rojnameyî nuştenê. Ma xêlê çî rojnameyan ra museme. La mixabin kurdê ke dilawêr û egîdî yê no çî ra mexrûm manenê. Ez zî serva ke şima kurdan biyayişanê dinya ra xeberdar bikera, raya marîfet û ilmî damusna, teşwîqê wendiş û nuştiş bikera eno rojnameyî vejena.“ Bi nê vatişan Rojnameyê Kurdistan 22ê Nîsan 1898’î de destpa weşan kerd. Rojnameyo ke heta 31. homarî vejîya vêşêr ser kultur û ziwanî de weşangerî kerd. Paytexta Misir Kahîre o wext zey hêlika çapemenîya nuşteyî bî.
‚Kurdistan’î herzewbîn mavêna kurdan de zanayişê netewbiyen zî ravey berd û raştê eleqeyê gird ame. Silêmanî ra heta Kerkuk, Amed ra heta Antalya, Bexdat ra heta Şam, Swîsre ra heta xêlê welatanê Awrûpa rojname vila bi. Îdarekaranê Osmanijan vilakerdiş û wendişê rojnameyî Diyar-ı Bekîr û xêlê cayan de tomet (qedexe) kerd. Yê ke rojname wanenê rê cezayê giranî amey dayen. Padîşaxê Osmanijan II. Abdulhamîd’î serva vindernayişê ‚Kurdistan’ Îdareyê Misir’î ra waşt ke Birayê Bedîrxanî welat ra bîrê vetiş. La rexmê nê qedexeyan ‚Kurdistan‘ çap bi û resya wendekaran. Kurdistan heta serra 1902 welatanê Misir, Swîsre û Îngilîstan de vejiya.
‚Rojnameyê Kurdistan‘ çapemeniya nikayî yê kurd rê mîrasekê gird û erja verada. Serr ra 118 serrî vêrdî ra, la çapemenîya kurdî hewna zî raştê qedexe, sansur û zextan yena. Polîtîkayê Împaratoriya Osmanijan roja ewroyî de zî ramenê. Çike hikumdarî raştişan ra tersenê. Nayî ra helw danê çapemenî bêveng bikerê, ya zî hewl danê çapemeniyeke hetkar ronê. Nika Tirkîya Azadîya Çapemenî û Fikir de 180 welatan de rêza 151. de ya. kerdişê nikayî yê dewrê Abdulhamîd’î ra hona jêde peyser şî.
Çapemenîya Azad yê Kurd 118 serrîyo merhaleyanê tewr giran ra vêrd ra û resya na roj. Xêlê îmtihananê giran, çemberanê adirîn ra vêrd ra. La ti wext raştiyan ra tawîz nêda. Bi desan rojnamegeran serreyê xo da, ganê xo da, la heqîqetî ra fek nêverda. Nayî ra raştî taritî de nêmendî û neyra tepya zî dê nêmanê. Çike serva nay, Mazlûman, Gurbetellî’yan, Enwer, Xelîl, Ferhat, Denîz, Rohat, Sarya, Agir û Apê Mûsa’yan ganê xo feda kerd. Rojnamegerîyeke bi mîlîtantî ramitî. Cok ra ala Rojnamegerîya Azad do neyra tepya zî her ca de va bido.