Heyet ard ziwan ki pêdiyinê peyin ê Îmralî de heyeta înan û heyeta dewleta jî estbî û wina vat: “Ê pêdiyinî de qerar girotiya heyeta çimdar roniyo. Ena heyeta çimdar, jew hefte badê mesaja birêz Ocalan’î ê Newrozî şiro Îmralî. Bi şiyayinê heyeta, muzakereyê resmî dest bikardayê ci. Wexto ki çarçiweyê prensîbanê asgarî de pê bikirê, birêz Ocalan’î qandê peyniyê lejê tifîngîn ê vera Tirkiye biyaro, PKK ra biwastayê kongreyê xo kom bikiro.”
Provokasyon vist dewre
Heyet vist vîrî ki çarçiweyê pêkerdinê Îmralî de kombiyayişê Saraya Dolmabahçe viraziya û wina vat: “ O kombiyayiş qandê çareserîn û aştî, jû gama tarîxî bi. La belê Serokkomar Erdogan’î mudaxele kerd. Demê muzakereyan înkar kerd. Pey ra werîşt vat ki, meseleya kurd çiniya. Bi enê vatenan demê çareserîn vindarna. Eynî wext êrişê vera partiya ma heme cayan dest kerd.”
Heyeta Îmralî weçînayinê 7’ê hezîrani zey cewabê vera siyasetê provokasyon û alozîn hesibina û vat:”Bi weçînayina şaranê ma, cewab da siyasetê provokasyon û alozîn ê Erdogan û AKP. Şaranê Tirkiye muzakere, aştî û çareserîn tercîh kerd. Nay ser AKP, badê weçînayinî Amed de provokasyon vist dewre. La belê peyniyê hesasiyê şar û partiya ma de, o provokasyon jî pûç vejiya.”
Tecrîdê vera Ocalan zey sînyalê cidî vînenê
Heyeta Îmralî ard ziwan ki vera heme bêcidîyetînê saziyanê dewlet, iyê hewl danê rayanê qandê çareserî akirê û wina dewam kerd: “Mîmarê enê heme xebatan birêz Ocalan o. Dewleta tecrîdê vera birêz Ocalan’î ramena. Eynî wext de vera Rojawa û Suriye tehdîtê lejî visto dewre. Ma zey heyet, tecrîdê vera Ocalan û tehdîdanê lejê herêmî, zey sînyalê cidî vînenê. Munaqeşeyê qandê ronayinê koalîsyonî û şertê zey qedînayinê demê çareserîn û zîhniyetê bazarîn ê AKP îşaretê cenayinê zengilê alarmiyo.”
Heyeta HDP ê Îmralî fina bîn baweriyê xo ê qandê serkewetinê çareserînê demokratîk ardo ziwan û wasto ki, rojê ravey peyniyê tecrîdî biyariyo û mekanîzmayê çareserîn roniyê û demê çareserîn zey hacetê bazarînê qandê ronayinê hukumetî mevîniyo.
Heyeta HDP dazanayin ki iyê vera talukeyan dest bi hamleyê siyasî ê qandê çareserîn, weşîna azad û demokratîk bikirê û wina vat: “Mayê bi mesûl û hesas hereket bikirê. Partiya ma HDP’ya çarçiweyê hamleya siyasetî de, bi partî û saziyanê sivîla mîtîngê aştî ê gird û çalakiyanê ciya ciya virazê. Fina bîn eleqey biancê lazimînê aştî û çareserîni ser.”
NAVENDA XEBERAN