Yêwîyê Pawitişî yê Şengalî (YBŞ û YJŞ) ke vera çeteyanê DAIŞî û sewbîna hêzan de Şengalî pawenî, bi cîya cîya hetan ra beşdarbîyayîşê merdiman hîna bihêz benî. Beşdarbîyayîşê ke Şengal de benî, tena seba azadîya herre nê, eynî wext de azadîya komelî zî îfade keno. Şaro ke zext û zordarîyê çeteyan ra eciz bîyo, vera xo dano hêzanê azadîwaştoxan û hêvîya xo gird keno.
Pî û kênayê ke şerê pawitişê erdê xo kenî, mîyanê yewîyê YBŞ û YJŞyî de ca gênî, eynî meterîs de şer kenî. Dewê ke hêrişê 3ê Tebaxa 2014î de raştê qirkerdişo gird yê çeteyanê DAIŞî ameyî ra yewe zî dewa Koço ya. Şerwanê YBŞyî Îbrahîm Murad Hewîn (50) zî kesê ke nê qirkerdişî ra xelisîyayî ra yew o. Hewîn mîyanê YBŞyo ke hetê şarê êzidî ra sey temînatê cuyayîşî yeno dîyayîş de cayê xo gêno. Hewîn bi 3 domananê xo 3 serrî yo ke rayîrê azadî de têkoşîn dano. Hewîn nika zî kênaya xo Berxwedan Tolhildane ke şerwana YJŞyî ya reyde eynî meterîs de ca gêno û têkoşîn dano.
Ma do bitepişî
Berxwedan Tolhildane qala hedefê xo yê beşdarbîyayîşî kerde û va, “Ez pîyê xo reyde eynî meterîs de şer kena û no mi de hîsanê weşan xelq keno. Xeyalê ma o yo ke ma bişînbî serkewtişêk qezenç bikerî û sey xelate dîyarîyê embazanê xo yê şehîdan bikerî. Ma do sozo ke dabî cinîyanê êzidîyan, bîyarî ca.” Tolhildane waşt ke heme xêrwaştoxî seba pawitişê Şengalî, beşdarê YBŞ û YJŞyî bibî û meterîsan de cayê xo bigîrî.
Pîyê Tolhildane Hewîn zî her çiqas ke 50 serreyî yo zî, emrê xo seba şerkerdişî vernîya xo de sey astengî nêvîneno. Hewîn zî seba ke kênaya xo reyde eynî meterîs de ca gêno, zaf kêfweş o û no kêfweşîya xo tim ano ziwan. Hewînî va ‘ez nika mîyanê şerî de seba ke lazimîyanê şerwanan pê bîyara ameya wezîfedarkerdiş.’ Hewînî veng da şarê Êzidî ke vera hêrişan de erjanê xo bipawo.”
ARÎN ARARAT / ANF / ŞENGAL