Tibo tebîî ke bi tarîxê merdimîye dest pêkerdo, ewro bi destê cinîya dewam keno. Cinîyî bi estena merdimîye tebîetî mîyan de yî û bi hêzê tebîetî bîyî zana. Labelê mîyanê demî de qurnazîya camêrdî ver zanatîya cinîye her ke şi vînî bîye. Cinîyî tarîx de dermanê ke nebatan reyde viraştênê, heme nêweşîyan rê çareserîye dîyênê. Cinîyî welidîyayîş, şikîyayîşê esteyî, ca ra vejîyayîşê esteyî û sewbîna ser o xeylê dermanî amade kerdî. Roja ma ya ewroyî de cinîyê ke nê ananeyî domnenî, estî. Nê cinîyan ra yewe zî Fîraz Kamaya 90 serreyî ya. Kamaya ke dewa Harîkî ya qezaya Qisle ya Dêrsim de cuyena, ewro ananeyê tibê tebîî domnena. Kama hetê komelî ra sey pispora tibê tebîî yena dîyayene. Nameyê Kamaye tena Dêrsim de nê, heta Stenbolî vila bîyo û tayê kesî Stenbol ra yenî û aye ra derman wazenî. Kamaye heta nika bi hezaran kesan rê derman dîyo û verê cû aye rê seba ke nêweşxane de doktorîye bikero, pêşnîyaz ameyo kerdene. Kama êdî zehmetîye ancena Kamaye dîyar kerde ke heta nika esteyê ke mi dekerdî cayê ci de qet problem nêvejîyayo û wina domnaye: “Ez verê bi destan şikite yan zî ca ra vejîyayîşê esteyî tespît kena. Dima ra ez bi layî reyde bestena û baş beno. Mi bi serran welidîyayîşê cinîyan bi hawayo tebîî da viraştî. Ez hêzê xo tebîetî ra gêna. Labelê seba ke êdî extîyar bîya, ez zehmetîye ancena.” n MA / DÊRSIM