Piştgiriya Erdogan a faşîzmê ye
Dîktatorê Tirk Tayyip Erdogan wê 28-29’ê Îlonê li Elmanyayê fermê bê ezimandin. Ev jî rê li ber nerazîbûnan vedike ku ji Tevgera Azadiyê Kurd, Çepgir û demokratên Tirk û Elman wê bi hev re vê serdanê, Erdogan û hikûmeta Elman a ku wî diezimîne protesto bikin.
Bi giştî 130 dezgeh û rêxistin kampanyaya bi vê armancê ya bi navê Erdogan Not Welcome destek dikin ku wê 28´ê Îlonê saet 16´an li Potzdamer Platz û 29´ê Îlonê jî saet 11´an li Deutzer Werftê çalakiyên şermezarkirina erdogan û ezimandina wî ya fermî bi rê ve bibe.
Hinan ji van rêxistinan bi daxuyaniyan bang li endam û alîgirîn xwe kirin da ku beşdarî van çalakiyan bibin. Konfederasyona Karkerên Tirkiyeyî li Ewrûpayê (ATÎK), Yenî Kadin û YDG-Yenî Demokrasî daxuyaniyek dan û ji bo şermezarkirina Erdogan bang kir. Di daxuyaniyê de hate ragihandin ku ew vexwendina dîktatorê faşîst Erdogan qebûl nakin: “Em bang li her kesên alîgirê azadiya civakî, siyasî û baweriyan dikin ku bi xurtî Erdogan şermezar bikin û têkoşîna hevpar xurt bikin.”
Di daxuyaniyê de îşaret bi têkiliya Erdogan a bi DAIŞ’ê re hate kirin û hate gotin, “Piştgiriya ji bo Erdogan piştgiriya ji bo faşîzmê ye.”
Merkel sîleh dan Erdogan li Şengalê qetil kir
Meclîsa Şengalê ya Derveyî Welat (MŞD) jî diyar kir ku ew ê serdana Elmanyayê ya dîktatorê Tirk Erdogan protesto bikin: “Bi vexwendina fermî ya hikûmeta Elmanyayê, Erdogan wê di 28 û 29’ê Îlonê de ji aliyê hikûmeta Elmanyayê bi fermî were pêşwazîkirin.
Erdogan bi çekên Elmanyayê gelê me li Başûrê Kurdistanê û li Rojava qetil dike. Erdogan bi çekên hikûmeta Merkel civaka me ya Êzîdî li Şengal û Efrînê qetil kir û êrişî Şengalê dike. Elmanya bi fermî Erdogan pêşwazî dike û diyar dike ku ew piştgiriyê dide dîktator Erdogan.
Em li ser navê Meclîsa Şengalê ya Derveyî Welat bang li hemû welatparêz û civaka xwe ya Êzidî dikin ku li dijî dîktator Erdogan û helwêsta hikûmeta Elmanyayê dakevin qadan.”
Têkoşîna li dijî zilmê wezîfeya Misilmanan e
Civaka Îslamî ya Kurdistanê (CÎK) jî bi heman armancê daxuyaniyek da.
CÎK´ê got, “Erdogan ê Yezîd ku 15 sal in welatê me û alema Îslamê kiriye gola xwînê, wê were Elmanyayê û ji bo ku bêhtir komkujiyan bike, wê doza çek û pereyan bike. Ev yek jî wê ji bo Kurdistan û alema Îslamê were wateya rijandina xwînê, fesadî û hilweşandinê. Her kesê ku xwe mirov, xwedî wijdan û oldar dibîne, divê li ber Erdogan rabe. Di pirtûka pîroz a Xwedê de têkoşîna li dijî zaliman weke wezîfeya bingehîn a Misilmanan tê destnîşankirin.”
CÎK´ê xwest Misilman li dijî Erdogan dengê xwe bilind bikin û got, “Rawestandina Erdogan wezîfeya her Misilman û mirovê xwedî wijdan e. Em bang li her kesî dikin ku vî şexsî protesto bike.“
Cih û dema çalakiyên navendî
Çalakiyên navendî yên di çarçoveya kampanyaya Erdogan Not Welcome (Erdogan tu ne bi xêr hatî) de wê li Berlîn û Kolnê bi rê ve biçin:
BERLÎN: 28’ê Îlonê saet 16:00´an, li Postdamer Platzê
KOLN: 29’ê Îlonê saet 11:00´an, li Deutzer Werftê