Komployê Mîyanneteweyî ke 15ê Sibate 1999î de vera Rayverê Şarê Kurd Abdullah Ocalanî virazîya Bakûr, Başûr, Rojawa, Rojhelat û teberê welatî de protesto beno. Nûmayişan de Kurdistanijî tecrîdê 18 serrî protesto kenê û serbestîya Rayverê xo wazenê. Ciwanê Amedî zî day zonayen ke şarê Kurd bi têkoşîn û xoverdayişê xo vernîya komplo girewt.
Quwetanê hegemonîk ê mîyanneteweyî, ke hewl danê ke Rojhelato Mîyanên newe ra dîzayn bikerê 15ê Sibate 1999î de, seba tesfîyekerdişê Hereketê Serbestî yê Kurdistan vera Ocalanî Komployekê Mîyanneteweyî viraştî. Ciwanê Amedijî ke ANF rê qisey kerdî vistî vîrî ke mîyanê 18 serran de şarê kurd û Hereketê Serbestî quwetir bîye.
Destkewtişan bipawê!
Ciwanan ra Mûhammed Eserî dîyar kerd ke quwetê ke verîya 18 serran bi hêsîrgirewtişê Rayverê înan waştî ke şarê kurd çinî bikerê, vernîya felsefeyê Rayverê Şarê Kurd de bi xo çin bî. Eserî da zonayen ke kurdê ke day pey rêçanê Ocalanî, ewro bîyê wayîrê statuyekê ke hetê pêrokîn dinya yeno qebûlkerdiş. Mûhammed Eserî ard ziwan ke eke Komployê Mîyanneteweyî serkewtiba, do kurdî ewro nêbiyayba yew girdêranê aktoranê Rojhelato Mîyanên û hayr ant tecrîdî ser: “Bi tecrîda xorîn ya ser Rayverîn ra hewl yeno dayiş ke têkilîya ci bi şarî ra bîro visnayiş. Vengdayişê mi pêrokîn kurdan ra no yo ke destkewtişanê bi desan serran bipawê (biseveknê).
Ma qebûl nêkenê
Cîhan Ozturk’î zî Rayverê Şarê Kurd zey pisûlayê şarî hesibna û va, ‘eke şareke pisûlayê xo vinî bikero, do raya xo zî vinî bikero.’ Ozturk’î hayr ant armancê Komployî ser û wina va: “Waştî şarî bê pisûla biternê û çin bikerê. La sernêkewtî. Serragêra 18. yê Komployî de hona zî Rayverê ma bin tecrîdeke giranî de yo. Zey ciwanê Kurd ma na rewşî qebûl nêkenê û wazenê Rayverê ma hetê fîzîkî azad bibo. Cayê Rayverî mîyanê şarî yo.”
Bivejyê meydanan
Gencan ra Xemgîn Topdemîr’î zî vist vîrî ke bi Komployî waştî destkewtî û têkoşîna şarê kurd çin bikerê. Topdemîrî veng da ciwananê kurd ke, zey 15'ê Sibata sifteyîn, 15'ê Sibata emserrî de zî Komploya faşîst protesto bikerê. Xemgîn Topdemîrî î ciwanan ra waşt ke seba serbestîya Rayverê xo bivejyê meydanan. Şakîr Demîr ke hayr ant armancê komplogeran ser, ard ziwan ke Komplo ser nêkewt û zey nimune zî xoverdayişê Sûr, Cizîr û Nisêbîn damisna.
‘Vengdayişê mi 'Xoverdayiş” o’
Şakîr Demîr’î hayr ant tecrîda girankerdî ya ser Ocalanî ser û wina va: “Dewlet dî, ke bi vatişeke bi tenya yê Rayverî ra bi mîlyonan kes şenê bivejyê meydanan. Dewlet xo nayî ra gêna. Bi hezaran sîyasetmedar tepêşîyay û bi desan şaredarî amey xespkerdiş. Şarê kurd serranê 80'î de vera cûntakaran, serranê 90'î de vera Hîzbûllahî û serranê 2000'î de zî hemverî operasyonanê qirkerdişê sîyasî xover da, do bi serberzî prosesê nikayî ra zî bivejyo. Vengdayişê mi seba şarê ma “Xoverdayiş” o. n ANF/AMED