15ê Îlona 2014 de çeteyanê DAIŞ bi destegê dewleta tirk, êrişê Kobanê kerd. Hedef îşgalkarînê Kobanê û bin vistişê Şoreşê Rojawa bi. La belê YPG û YPJ, şarê Kobanê ra pîya, vera çeteyanê DAIŞ da xover û Kobanê açarna qeleya xoverdayişî û destanê tarîxî nûsna.No xoverdayişî eleqeyê heme dinya ant. 

Nûmayişa fedaî yê lejwana YPJ Arîn Mîrkan ya verra çeteyan, pêrokîn dinya de veng da. Arîn bî sembola xoverdayişê ceniyan û yê Kobanê. Bakûr û heme Kurdistan zî serva Kobanê serferber bi.


300 SGDFyijî kewtî raya Kobanê

Netîceyê xoverdayişê tarîxî û destanî de, 26ê Çileyê 2015 de, Kobanê bi temamî çeteyan ra xelesîya. La Kobanê yo ke dûştê êrişan xover da bibi xirabe, sî (kerra) ser sî nêmendbî. Bi destegê pêronê kurdan, saziyanê heqê merdiman û destegê şoreşgeranê enternasyonalîst, xebatê newe ra înşayî dest kerdî ci.

Nezdiyê 300 azayanê Federasyonê Gencanê Sosyalîst SGDF zî, bi siloganê "Ma Kobanê pîya pawit û ma dê pîya newe ra ronê" kewtîbî raya Kobanê ser. Bi coş û heyecanê gird resaybî qezayê Riha Pirsûs, ke şahîdînê xoverdayişê Kobanê kerdbi.

Gencan sûkanê Kurdistan û Tirkîye ra, qandê qeçikanê (doman) Kobanê, kaykerdoxî arê kerd bî û wastbi înan zî biresnê qeçikanê Kobanê. Dekewtişê Pirsûs de, polîsan kamîya pêrokînan qontrol kerdbi. Bado zî gencî ravêrdî Merkezê Kultur ê Amara. Wija rayveranê HDP û DBP înan pêşwazî kerdî. Gencan waştişê ravêrdişê Kobanê zî, resnay qeymeqamtî. La belê qeymeqamtî cewabê nêyinî da na weşten û aşkere kerd ke iyê dê destûr nêdê ke pêrokînî ravêrê, tenîya jû kom şena şiro.


Hesabê ci do bîro persayiş

Gencê ke waştî pêro pîya şirê Kobanê, qandê ke na waştena xo biyarê ziwan, waştî baxçeyê Merkezê Kultur ê Amara de damûstayin bidê çapemenî. La wextê dayişê damûstayinî de, çeteyê DAIŞ bi hetkarînê AKP êrişê întixarî viraşt. Netîceyê teqînayişî de, 33 kesan weşîya xo kerd vinî û xeylê ci zî bî dirbetin. Hikumeta AKP û dewleta tirk zey komkiştenanê verînan, çimê xo na komkişten rê zî girot û qandê roşnî nêbo zî, heme çî kerd û kena. Wazîyeno ke welatijî û çoşmeyê demokratîkî na komkişten xo vîra bikerê. La belê sernî de embazê şehîdanê Pirsûs û Kurdistanî, heme çormeyê demokratîk vanê ke, iyê komkişten xo vîra mekirê, rew yan zî herey hesabê ci pers bikirê.

Şehîdê Qetlîama Pirsûs vizêr verikîn Pirsûs û xêlê cayan de amey vîrarden. Hemseroka HDP Fîgen Yuksekdag zî serva vîrarden şî Pirsûs. 


MLKP: Xeyalê înan dê nîme nêmanê

Bi wesîleyê Serragêra Qetlîma Pirsûs de Rêxistina Rojawa yê MLKP zî damûstayînek da û kesê ke weşîya xo kerdî vinî vîr ard. MLKP vist vîrî ke 33 gencê ke amey qetilkerden dûştê faşîzmî meşaleya azadî yê Kurdistan, Tirkîye û Rojhelatê Mîyanî hewaday. Damûstayîn de vajîya ke heyfê 33 gencan do bîro giroten. 


 NAVENDÊ XEBERAN