KASIM ENGÎN / ANF / BEHDÎNAN
Ma ver bi rojbîyayîşêk şonî. Hetê bîyolojîkî de rojbîyayîşî estî, yenî pîrozkerdiş. Hetê sîyasî de rojbîyayîşî estî, yenî yadkerdiş. Hetê kulturî de rojbîyayîşî estî, muqades î. Hetê felsefe de rojbîyayîşî estî, yenî cuyayîş… Ma PKK reyde newe ra ameyî dinya, hem pîroz kenî, hem yad kenî û hem zî cuyenî.
PKK çalakîya newe ra xelqkerdişê merdimî yo. Eke no merdim statuyê dagîrkerîye de mendo, o wext no xelqkerdiş hîna muhîm o. Sey vatişê embazêkî ma ‘şoriş cayê merdimê waroginayeyan o’. Çimkî yê ke seba azadî têkoşîn danî, yê ke cayê xo ra memnun nîyî yî. Cok ra merdimê ke wazenî na rewşe ra bixelisyî, têkoşînê azadîye de ca gênî.
PKK mîyanê şaro ke tewr bêstatu yo de sey tevgerê mizgînîye xelq bî. Cok ra sey mizgînîyêk a. Na mizgînî seba şarê kurdî mizgînîya ti eşkenî azade bibî ya. Na mizgînîya ti eşkenî nêyî ra bixelisyî ya. Na mizgînîya eke ti seba xobîyayîşî têkoşîn bidî, ti eşkenî bibî heme çî ya.
Ewro şarê kurd rayîrê azadbîyayîşî de bi gamanê qerardaran aver şono û cayê xo yê naletinî ra zî xelisîyayo. Cok ra PKK nameyê newe ra qezençkerdişî yo. PKK parçekerdişê tarîtîye û awankerdişê roşnîye yo. PKK eke lazimî bibo xac zî gêno çimê xo û beno Îsa; nameyê nê qîrayîşî yo. PKK vengê yê ke vera kehenperestî, heqaret, zîncîr, koletî, dirîtî û zulmî de seba edalet, rindî û başî vejîyayî yo. PKK ziwanê yê ke waştî qisey bikerî û ziwanê înan ame birnayîşî yo. PKK vengê kesê ke sey Manî û Hallacî waştî qîr bikerî û ameyî çermkerdişî yo. Ma nika ra rojbîyayîşê na mizgînîye silam kenî û pîroz kenî.”
Serewerdarnayîş û bawerîya cewherî
Ma gerîlayî koyanê azadîye de çîyê ke partîya ma xelq kerdî ser o munaqeşe kenî û ma do hertim bikerî zî. Hîkayeya her embazo ke beşarê PKKyî beno, sey yewbînan o. Beno ke merdimî vajî qederê merdiman yewbînan ra cîya bo. Cok ra ganî merdim hîkayeyê kesê ke beşdarê PKKyî bîyî ser o cigêrayîş bikero.
Wexto ke ez şenik bîya tayê kadroyê PKKyî ameyênê keyeyê ma û nika wexto ke ez ê hîsan ser o fikirîyena, fikrê mi hîna zelal beno. Ê kadroyan ewil heme çîyî red kerdêne, nêecêbnayêne. Xusûsîyeto dîyine yê ê merdiman xo ra zaf bawer kerdênê. Zaf wende nêbî, zaf wina qelew û gird zî nêbî. Labelê zaf rehet bî û sey ke înan dinya xelq kerda, xo ra bawer kerdêne.
Xusûsîyeto 3. yê ê merdiman zî zaf serewedarkar bî. Labelê serewedarkarîya xo seba çîyo ke esto rê nêkerdêne. Keyeyê xo caverdaybî, heskerdeyanê xo caverdaybî. Cilê înan zî newe nêbî. Her roje banêk de mendênê.
PKKyî yê ke red bikerî heta peynî kerdênê, yê ke biecêbnayêne zî heta peynî domnayêne. Herçiqas ke tay û ciwan bî zî vera bêedaletî û dagîrkerîye de xo ra bawer kerdênê. Cok ra eke ewro no şar her ca de rêze vîneno, saya Rayberî û nê PKKyîyan de yo. Ma serrgêra PKKyî de vanî ma şima qet xo vîra nêkerdo.