Fermandarê Qerargeyê Merkezê Pawitişê Şarî Mûrat Karayilanî beşdarê programê televîzyonî bi û ewja de çîyê ke rojeve de yî ser o qisey kerd û mesajê muhîmî dayî. Karayilanî bitaybetî dagîrkerîya dewleta tirkî ya Başûrê Kurdîstanî ser o vindet.
Karayilanî sere de ez 3 merdimanê ke Kortek de şehîd kewtê vîr ard û wina va: “Rejîmê AKP-MHP-Ergenekonî yê dişmenê Kurdan ê bisondî ê şehîd kerdê. Do gonîya înan erd de nêmano û qesasê înan bêro girewtene. Sere de ma keyeyanê nê şehîdan rê, şarê Qendîlî rê, şarê Başûrê Kurdistanî rê û hemeyê şarê ma rê serweşîye wazenê. Ancî ez birîndaran rê zî şîfaya lezgîne wazena.”
Karayilanî da zanayene ke ganî hukmatê herême û selahîyetdarê PDKyî dewleta Tirkî rê hende ware nêakero û wina va: “Na şaşîyêka pîl a. MÎTê dewleta Tirkî rê dayîşê îstîxbaratî şaşîyêka pîl a. No xizmetê Kurdan nêkeno. Netîce de ewladê ercayeyî yê şarê Kurdî û mîlîtanê êyê fedaîyî hetê teyareyanê Tirkan ra yenê şehîdkerdene. Yan zî şarê ma yo sivîl yeno şehîdkerdene. Çimê dewleta Tirkî de heme Kurdî terrorist ê û kişîyayîşê înan helal o.”
Sîyaseto xelet şarê Başûrî rê xizmet nêkeno Karayilanî va ‘ma wazenê problemanê mabênê xo bi dîyalogî hal bikerê’ û wina domna: “Hewna zî ma pawenê ke ê do kemanîyê xo bivînê û sîyasetê xo bivurnê. No sîyaseto xelet şarê ma rê xusûsen zî şarê ma yê Başûrî rê xizmet nêkeno. Çi problem esto ma wazenê bi dîyalogî hal bikerê. Herkes zano ke ma vera dewleta Tirkî de şer kenê. Ma Dêrsim, Amanos, Botan û Amed de şer kenê. La dewleta Tirkî werzena yena sînorê ci ra 120 kîlometre dûrî hêrişê şarê ma yê Kortekî kena. Tayê zî vejênê vanê ‘Rîyê şerê mabênê PKKyî û dewleta Tirkî ra wina beno’. Waye û birayê mi wina nêyo! Ma Vakurê Kurdistanî de şer kenê. Bi nê hawayî gama ke dewleta Tirkî zî hêrişê Başûrê Kurdistanî kena, ma qerardar ê ke heta peynî xover bidê. Ma do qezencanê şarê xo her ca de bipawê, çunke ma fedaîyê nê şarî yê.”
ANF / BEHDÎNAN