SELAMÎ ASLAN/DÎHABER/ŞENGAL


Cinîya bi nameyê Xenzê Silêman ke wextê Fermanê 3ê Tebaxe de bi Korîdorê Weşîye ke quwetanê YPG, YPJ û HPG akerd ra xelesîya aşkere kerd ke êzîdî hinî êzîdîyê verî nîyê, resyayê quwetê xo yê cewherî. Silêman, ard ziwan ke hinî iyê dê qet Şengal ra nêvejyê.

Komanê DAIŞ 3ê Tebaxe 2014 hêrîşê herêmanê Şengalî kerdî. PDK ya ke tîvarîya Şengalî girot, Şengal verda û DAIŞî ra remîya. Bado ke PDK Şengal verada, çeteyê DAIŞî kewtî Şengal û dest pê komkiştişî kerdî. Çeteyan bi hezaran Êzidîyan qetil kerdî û bi hezaranê ci zî hêsîr girotî. Ser komkiştena Şengalî ra 3 serrî vîyartî. Bi hezaran doman û cinî Şengalî ra vejyay û bî koçber. Hêrîşî de DAIŞ’î mal û milkê êzîdiyan kerdî talan û  wêran. Bado ke quwetê YPG, YPJ, HPG û YJA Star resyay Şengal,  ver bi Rojawa korîdorêko weşîye akerdî. Bi saya nayî bi hezaran êzîdi kiştişî ra xelesîyay. Kesê ke korîdorê Weşîye ra xelesîyay ra yew zî cinîya binameyê Xenzê Silêman a. Silêman ke bado ke Şengal azad bi ra dima, agêyra Şengalê dîyar kerd ke hinî ê bîyê wayîrê quwetê cewherî û mumkûn nîyo ke ê fina da bîn Şengal ra bivejyê.


‘Sereyê ma cikerê zî ma nêşinê’

Maya 11 domanan Xenzê Silêman bi nê vatenan qala wextê komkişten kerd: “Hamnan bi. Ne aw û ne zî werdiş estbi. Ma xo bê postal eşt teber û ma kewtî ray. Bi sebebo ke domanî zî bê postalî kewtbî ray lingê înan bî gonî. Ma bi hezaran kesî remay û xo resnay koyan. Ma veyşan û teyşan bî. Bîrekê aw yê verî koyî de amebi kinitiş estbi. Ma ewja ra aw peyda kerd.”

Silêman vist vîrî ke heta ke gerîlayê HGP û YJA-Star şî hewara înan, înan koyan nêterkna û wina dewam kerd: “Ma 10 rojî koyan de mendî. Tayî malbatî verî ra ameybî. Baxçeyê şamik, xiyar û îsotan estbi. Ma çend rojan bi înan îdare kerd. Bado ke embazî amey ma xelesîyay. 3 serrîyo ma nê koyan de yî. Sereyê ma cikerê zî ma nê koyan ra nêşinê.”


PKK raya DAIŞ birna

Xenzê Silêman ard ziwan ke PKK şî û înan xelesna û aşkere kerd ke PKK seba înan bî omid. Silêman vist vîrî ke eke PKK nêresyabîya, do komkiştenêka gird qewimyabîya û wina va: “Êzidî paweyê ameyîşê PKK bî. Vatî ‘do PKK bîro, do PKK bîro’. Wexto ke DAIŞ kewt Girzêrik, êzidî bi omid paweyê PKK bî. Gerîlayê PKK wexto ke DAIŞ ame, çend embazan bi hawayê nimite nê koyan de bica kerd. Çend şervanê PKK, wexto ke ferman de PDK paştê xo ma rê açarna û rema, vera DAIŞ şer kerdî. PKK raya DAIŞ birna. Ma rê aw ard, gaz, cil, postal û werdiş ard.


Mesûlê komkişten PDK yo

Silêman, helwestê PDK rê nêrazîbîyayîş damûsna û wina va: “Wexto ke DAIŞ ame, PDK ma terk kerd û şî. Eke pawitişê ma kerdbîya, ma do zî şer kerdiba. PDK verîya fermanî dewanê êzidîyan geyra û çekê (tifing) welatijan destê înan ra girotî. Eke çekê ma bibîyayba, ma do vera DAIŞ şer kerdiba. Ne PDK şer kerd û ne zî virada ma şer bikerê. Mesûlê na komkişten PDK yo. 


‘Tehlukeyê newe Haşdî Şabî yo’

Silêman hayr ant tehlukeyê Haşdî Şabî ser û dazanayîş ke Haşdî Şabî şino hardê Şengal de tayî dewan de quwetanê xo bica keno. Silêman aşkere kerd ke bîyayîşê Haşdî Şabî seba înan tehluke yo.

Silêman vist vîrî ke hinî şarê êzidî hişyar û zane bîyo û qiseyanê xo bi nê vatenan qedêna: “Ferman ra dima civakê êzîdî xo bi rêxistin kerd, quwetê xo yê cewherî xurt kerd. Êzîdî yê verî nîyê. Ma veng danê pêro êzidîyan ke bîrê YBŞ û YJŞ de ca bigîrê. Tang û topê Barzanî bi qasê dinya yê, la  qîmetê înan çin o. Çiqes ke YBŞ quwetin bibo, hendayî zî ferman kêm benê. Keynaya mi ferman ra dima tewrê PKK bî. Waşt şiro perwerde û ageyro bîro Şengal bipawo. La hêrîşê TSK yê vera Qendîl de weşîya xo kerd vinî.”