Endamê Komîteya Merkezî ya PKKyî Cemal Şerîkî serrgêra ronîyayîşê PKKyî ser o va ‘PKK temînatê ameyoxê Kurdîstanî yo’ û wina dewam kerd: “Saya PKKyî de şarê Kurdîstan û Rojhelatê Mîyanênî hêvîya xo vînî nêkenî. Têkoşînê ewroyî do seba têkoşînê ameyoxî zî bibo binge.”
Endamê Komîteya Merkezî ya PKKyî Cemal Şerikî derheqê serrgêra 40. ya ronîyayîşê PKKyî de qisey kerd. Şerikî da zanayene ke 40 serrî tena seba partî yan zî rêxistinêk nê, seba şarêkî zî bîyî merhaleyêko zaf muhîm.
Şerikî va ‘hema vaje PKK nêm seserre yo ke têkoşînê azadîye domneno’ û wina dewam kerd: “Ez serrgêra 40. de Rayber Apoyî silam kena û heme şehîdan biminet yad kena. Tarîxê partîye de nê 40 serrî zaf muhîm î. No proses bi Rayber Apo, Hakî Karer û Kemal Pîrî dest pêkerd. Yanî no proses 40 serrî ra zêdeyêr o ke dewam keno.”
Şerikî dewamê qiseykerdişê xo de va ‘hende serran de bedelê girdî ameyî dayene’ û wina domna: “Mîyanê hende serran de bi hezaran şehîdî ameyî dayene, zehmetîyê girdî ameyî dîyayene û hetê nînan de têkoşînêko gird zî esto. No nîşan dano ke orte de hêzêko gird esto. Nika ra pey zî do têkoşînêko gird bêro dayene. Cok ra PKK temînatê ameyoxî yo zî.”
PKK rojeva mîyanneteweyî dîyar keno
Şerikî qiseykerdişê xo de qala kesê ke verê cû vatêne ‘do nameyê PKKyî zî nêro vatene’ kerd û wina va: “PKK 40 serrî yo ke payan ser o yo û ewro herkes qala PKKyî keno. Hêzê mîyanneteweyîyî kombîyayîşan virazenî û qeraran gênî. Wexto ke qeraran gênî, goreyê estena PKKyî gênî. Tewr peynî Amerîka derheqê kadroyanê ma de qerarî girewtî. Qeraro ke Amerîka girewto daxî nîşan dano ke PKK hîna sîyaset û rojeva mîyanneteweyî dîyar keno. Ê ke vatêne ke ‘do nameyê PKKyî zî nêro vatene’ heme qedîyayî û şîyî. Sey nimune Tansu Çîllere wina vatêne, la aye bi xo qedîyaye.”
Şerikî dewamê qiseykerdişê xo de wina va: “Serra 41. ya PKKyî tena hêzê ci yê vera dişmenî de nîşan nêdano, eynî wextî de seba ameyoxê Kurdîstanî temînatêk o. Saya PKKyî de şarê Kurdîstan û Rojhelatê Mîyanênî hêvîya xo vînî nêkenî. No seba şaranê dinya zî wina yo. Têkoşîno ke ewro yeno dayene do seba têkoşînê ameyoxî zî bibo binge.”
Têkoşînê PKKyî rejîmê şerî yê tirkî tersneno
Şerîkî qiseykerdişê xo de bale ant tecrîdo ke Rayberê Şarê Kurdî Abdullah Ocalanî ser û wina va: “Serra 41. ya PKKyî eynî wextî de seba azadîya welatê ma û Rayberîya ma zî muhîm a. Çimkî ê ke PKK ronayo Rayber Apo yo. Hêrişê ke vera PKKyî de estî, hêrişê ke vera Rayber Apoyî de benî ra cîyayêr nîyî. PKK her ke bi têkoşînê nizdîyê azadîye beno, hende rejîmê şerî yê tirkî tersneno. No semed ra yo ke Rayber Apoyî ser o dest bi domnayîşê tecrîdî kerdî.”
Serrgêre yena manaya parçebîyayîşê tecrîdî
Şerikî peynîya qiseykerdişê xo de wina va: “Tena qerarê domnayîşê tecrîdî nê, derheqê îdarekar û kadroyanê ma yê rayberan de tayê qerarî girewtî. Serrgêra 40. ya PKKyî eynî wext de yeno manaya parçekerdişê tecrîdo ke Rayberîye ser o yeno domnayene û qerarê ke derheqê kadro û îdarekaranê rayberan de ameyî girewtî. Ma bi nê raştîyan kewenî serra 41. ya PKKyî. Ma Rayber Apoyo ke rojêka winasî ma rê verdayo û heme şehîdanê xo rê girêdayîya xo nîşan danî.”
ANF / BEHDÎNAN