Peyniyê hêrişî de 4 kesan weşînê xo kerd vinî û vêşiyê 400 kesî zî bî dirbetinî. Tertele heme cayan bî sebebê nêrazîbiyayinê tûjî. Kurdistanijan û raya pêrin a demokratîk zî, terteleyê ra dewleta tirk û hukimeta AKP mesûl girot.
AKP qandê xo bixelisino, kesê bi nameyê Orhan G ê endamê DAIŞ girot binçim. Verê çend rojan vejiyabi werte, dewleta tirk rojê verê hêrişê bombeyin, teqîbê teknîk ê derheqê hêrişkar Orhan G. de hewadayo.
Nika zî vejiya werte ki, polîsanê tirk 2 rojî verê terteleyê jew otelî de bombekar ziyaret kerdo.
Polîsan qeydê otelî ra diyo ki Orhan G. bi sebebo lejkerîna xo nêkerda, derheqê ey de qerarê geyrayin esto. Nay ser şiyê otel, Orhan G’ya pêdiyin viraşto û jû kaxiza qandê şiro lejkerî daye ci û wija ra aviriyayê. Rojnameyê tirk Hurriyet belgeyê pêdiyinê polîs û bombekar zî manşetê xo ra daya.
Her çiqas vajiyeno ki polîsî qandê meseleya lejkerîn şiyê otel zî, vatenê piyê bombekarî îdîayê polîsan pûç vejenê.
Piyê bombekarî vatibi ke ey verê 7 mengan mudirînê polîsan derheqê lajê xo de xeberdar kerdo û polîsan ra vato ki, lajê ey biyo vinî û texmîn keno tewrê DAIŞ biyo.
Bi vatena bîna, xebera polîsan esta Orhan G endamê DAIŞ'o û coka jî otel de ziyaretkerdinê bombekarî, zey hedreyinê hêrişê vera mîtîngê HDP vîniyeno.
AMED