Hukmatê AKPyî bi OHALî lez dayo talanê tebîetî. Cerratepe de destûr dîya vetişê madenî, Dêrsim de viraştişê HES û şewatê ke Licê, Şirnex û Dêrsim de mudaxeleyê ci nêame kerdiş û teqnayîşê Heskîfo ke mîrasê bi hezar serran o û sewbîna xeylê kerdişê nê hukmatî estî.
Babete ser o Rojnamegere û Nuştoxe Pelîn Cengîze qisey kerde û vînayîşê xo arde ziwan.
Cengîze va ‘pey nê sîyasetê talanî de fikrê çîyo ke nêşêno bi sîyaset bigîro, bênasname û bêmerdim veradayîş reyde gêno, esto’ û wina dewam kerde: “AKP polîtîkayanê talanî çend lingan ser ro meşneno. Nînan ra yewe vurîyayîşê bajarî û ekonomîya betonî ya. Ya bînî zî sermayegozarîya enerjî ya. Sermayegozarîya înan ser santralê nukleer û sewbîna ser ro yo. Ekonomîya talan, rant û xespî 8-9 serranê peyênan de zêde bîya.”
Sey ke hêrişê dişmenî bikerî
Cengîze bale ante şewatê ke Dêrsim de vejîyaybî û teqnayîşê tarîxî ke Heskîf de dewam kenî ser û wina va: “Verê cû zî nê polîtîkayî hetê polîtîkayanê ewleyîye de ameyêne meşnayîş. Bitaybetî hêrişê Newala Munzurî kenî. Hetê nê polîtîkayan de bi hawayo sîstematîk şewatê ke operasyonanê leşkerî de vejenî estî. Seba ke Dêrsim de hende zext û tedayî estî, reyna zî nêşînê Dêrsimî teslîm bigîrî, cok ra Dêrsim kerdî hedef. Ewro Heskîf de bi dînamîtan cayanê tarîxîyan teqnenî û çinî kenî. Seba Heskîfî hem mîyanê welatî de hem zî hetê mîyanneteweyî de xeylê kampanyayî virazîyayî, labelê netîce orte de yo.”
Reyna zî xoverdayîş esto
Cengîze va ‘herçiqas ke tebîet ser de hende zext û tedayî estî, reyna zî çar hetê Tirkîya de têkoşînî dewam kenî’ û wina dewam kerde: “Têkoşîno ke Cerattepe de yeno dayîş, 25 serrî yo ke dewam keno. Hema vaje cayo ke dest nêdîyayo piro nêmendo. Nika tayê herêmî hîna zaf zehmetîyan ancenî. Çi heyf ke tayê cayan de vernîya nê qirkerdişî nêame girewtiş. Nika şert û mercê OHALî de talanê tebîetî hîna zêde bîyo. Rojeva Tirkîya de babetê hîna cîyayêrî estî; hûmara rojnamegerê tewqîfbîyayeyan zêde bena, sîyasetmedarî tewqîf bîyî, hetê demokrasî û heqê merdiman de her ke şono hîna zaf tepîyaşîyayîş esto û sewbîna. Nika xetimîyayîşêk esto û peynîya peynî çîyê ke wazenî, kenî. Prosesê huqûqî zaf derg beno, eke mudaxale nêro kerdiş, do wext ser ra derbaz bibo.”
S. ASUMAN DEMÎR /STENBOL - DÎHABER