Amedî de citkarêy taxa Ornegî verê xo dayê romitişê lazûtî (misirî). Goreya ke zafêreya citkaran ardîy ziwan, semedê polîtîka hukûmatî ya citkarî çîno ra, Amedî de citkarîy perîşan bîyê. Verî peme ramitêy, na gam zî semedo ke mesrefa lazûtî tayn şino, pemeyî ra fek veradayê lazût ramenêy ke cuyayişê xo dewam bikerêy.
Goreya ke citkarêy taxa Ornegî vanêy; nezdî 10 serrêy ke peme pere nêkerda û teberî ra hukûmat peme îthal kerda pemeyê citkarêy Amedî û yê Tirkîyayî de ramenêy pere nêkerdo û heme citkarêy ke peme ramitnê na gam semedo ke perîşan bîyê û nêşkenêy mesrefa pemeyî bikerêy û verê xo dayê ramitişê lazûtî, xile, nehayan û karêy tewr bi tewran.
Citkareyî qedîya
Fekê kamcin citkarêy Amedî abeno se qala çînêbîyişê polîtîka citkarî ya hukûmatî kerdîy û zey adir fekê înan ra bivaro nêy vatişan vatîy: “Armanca hukûmatî qedînayişê citkaran o se, ma nêqedîyenêy. Beno ke polîtîka citkarî ya hukûmatî çîno ra, ma dest pemeyî ra vera dabo la semedo ke ma bicuyê lazimo ke bi hezaran donim erdanêy xo ma biramê û veng meternê. No semedî ra zî, na gam citkareya pemeyî ra zafêreya ma ravêray citkareya lazûtî û tayn zî zewîyê bîn û karêy tewr bi tewran kenêy. Tersa ma oyo ke citkareya lazûtî zî biqedînê. Eke teberî ra lazûtî zî zaf îthal bikerêy se halê ma hewna zî xedar beno la nêtê ma çîno ke ma verbê polîtîka hukûmatî de conganê xo bîyarê erdî ser. Heta ke mara bêro ma do tekoşîna cuyayişê xo bi araqa çareyê xo biderêy.”
Buhayê zewîyî verî ro
Derdê citkaran bi giranî yew veng û rengin o. Heteke ra gazincê xo polîtîkayî ra kerdîy la heteke ra zî waştî ke wa hukûmat verî romitişê zewîyî buhayê tabanî aşkera bikera û vatîy: “Eke polîtîka bibo se, hewna ma zewîyeke nêramito, gere hukûmat buhayê heme zêwîyan aşkera bikera. Kamcin zewî kuno sereyê citkarî û erdê ey ra beno se, wa ey nîşanê hukûmatî bido taehut bikero ra pey dest bi romitiş û ronayişê zewîyî bikero ke wa ma kar û zirara xo citkar bizano ke ked û pereyê ma wa hinî meşêrêy. Buhayê zibilî (gubreyî) mazotî zaf vay êy. Lazimo ke bi polîtîkayeke newe heme citkarîy boya xo ya des serran ya teng bivejo teber û karê xo bi dilweşî bikero.”