Hikumeta AKP 7’ê Hezîrane ra heta nika çarçoveyê konseptê lejî de hewl dana îradeyê şarê kurd bi qetilkerdiş û koçkerdişî bişikno û sûkanê ke hîsê kurdewarîye tede xorîn o, zeyîf bikero. Nînan ra yew zî sûka Şirnex a.  Dewleta ke Şirnex de nêşa îradeyê şarî teslîm bigîro, goçî ferzê şarî kena. Babete ser o malbatê ke vera hêrişanê gird yê dewlete de neçar mendî ke 10 km durî sûkî de çadirî ronayê, qalî kerdî. 


Wa dewlet bivejyo

Cenîyan ra Gule Supkî hayr ant kerdenanê dewleta tirk yê serranê verî ser û va: “Ma serrê 90’î de Bilmatî de mendî û a çax dewlet dewanê ma veşna û ma dewanê ma ra vet. Ma aye wext ameyî Şirnex. Nika zî dewlet ma Şirnexî ra vet la ma zî ameyî cayê tewr nêzdî û ma tîya de çadirî ronayî”. Gule Supkî vist vîrî ke her şewe eştişê topan yeno kerdiş û da zonayen ke ê zî nayî ra şahidî kenî û wina va, “Dewlet ser herra ma de huzir nêdana ma. Wa dewlet hinî bivîno ke ma herra xo canêverda û ma nêşî. Şima se kenî, bikê ma fek herre û domananê xo ra veranêdanî”. 


Ma nêşî sewbîna ca

Cenîya bi nameyê Esmer Supkî dîyar kerd ke dewlet bi heme firsendê xo hêrişê şarî kena û wina vat: “Dewlet reyna sey serrê 90’î waşt ma bido koçkerdiş la ma nêşî sewbîna ca û ma herra xo de yî. Ma nêşî herra tirkan û reyna ma herra xo tercîx kerd. Dewleta zalim bi tanq û topanê xo kewt şaristanê ma. Topê ke erzenî ma, înan rê beno kefen. Nê erdan de cayê înan çin o, ganî baş fam bikerî.”


Erdogan dişmenê herkesî yo

Heybet Gungen zî veng da Emîne Erdogan û wina vat: “Emîne çend zerrîya ma veşa se wa zerrîya to zî biveşo. Şima kamder heqî reyde şaristanê ma bi tanq û topan xira kenî. Ê ke tîya de xerîb ê, Erdogan û quwetê ci yî. Şima seba dagîrkerdişê herra ma ameyî û helbet domanê na herre zî dê xo û herra xo bipawî. Wa tirkî zî bieşnawî; Erdogan dişmenê ma hemînan o. Çike o domananê xo nêeşraweno. AKP ma bi zorî keyeyanê ma ra vet û ma zî ameyî tîya de çadiran de cuyenî. Erdogan û quwetê ci keyeyanê ma xira bikerî zî ma dê biagêrî ser herra xo.”  


 JINHA/ŞIRNEX




Sere nêronenê


Wekîla HDP yê Şirnex’î Aycan Îrmez destnîşan kerd ke dewlet dûştê waştişê şarî 7’ê Hezîran’î ra heta nika bi tanq û topan hêriş kena û wina verdewam kerd: “Semedo ke xeyalê Erdogan’î yê dîktatorî veng vejya, destpa lejekê gird kerd. Esil hedefê AKP o yo ke kurdan sey se serrê vîyarte reyna bê statu verado, la kurdî hinî bê statuyî qebul nêkenî û bi xoverdayîşê xo zî tay mendo ke kurdî statuya xo qezenc bikerî. 


Erdogan dûştê şarî herb keno

Îrmez dergeyîya qalîkerdişê xo de vat ke Şirnex de sucê merdimî yenê kerdiş û wina va: “Erdogan serra 2011 de derheqê Sûrîye de vatênê ‘Esad dûştê şarê xo şer dayo destpêkerdiş û hêrişê şarê xo keno’ nika zî o bi xo eynî çî keno. O çax Erdogan dûştê Esad’î veng da bi Neteweyê Yewîye (NY), ma zî nika dûştê Erdogan o ke sûcê merdimîye keno, veng danî NY û heme dezgeyê mîyanneteweyî. No şar dûştê ti zilmî sere nêrona û do nêrono zî. Ma veng danî her kesî wa Şirnex’î ra wayîr bivejyî.”