Çîftkûranî vist vîrî ke Aşma Muqades yê hometa Îslamî de cayanê rayverînan de ke bi destê dewlet amey talan kerden de şar serva akerdişê fitarî zî werdiş nêvînenê.
Yardimdayiş ferz o
Çîftkûranî hayr ant terora AKP ser û wina dewam kerd: “Zey ke şima zanê hardê ma eve tûfaneke gird ra rî bi rî mendî. Xêlê kesî mecbûr mendî ke keye, baxçe û warê xo terk bikero û goç bikero. Goreyê dînê Îslam kesê ke rewşekê zorî de yê rê yardimdayiş ser Misilmanan ferz o. Çike dînê Îslam ser felsefeyê ciwiyakerdişê însanî ser o ronîya yo, ser kiştişî nê.”
Serokê Komîsyonê Bawerîyan yê Şaredarîya Sûka Pîl yê Amed Zahît Çîftkûranî aşkere kerd ke roj roja paştîdayişê şarê Gever, Nisêbîn, Sûr û Şirnex o. Çîftkûranî vist vîrî ke nimaz kerdiş, roje girotiş tenya feyda dano ferdî bi xo û va, Misilmantîya raştîn xebatê ke faydeyê pêrokîn însanîyetê bikerê ramitiş o.
Nêheqîyan rê çimanê xo girotiş Misilmantî nîyo
Zahît Çîftkûranî dîyar kerd ke Misilmantî nêheqîyan rê çimanê xo girotiş û keye de nimaz kerdiş, roje girotiş nîyo û wina dewam kerd: ”Bawerîyeke winayî, bawerî nîya. Bawerîya ma wextê tûfanî de, nezdîbîyayişê ma yê însananê bîn ra vejyena werte.”
Çîftkûranî vatena Hz. Mihammedî ya ‘Yê ke imbiryanê ci veyşanî yê, bi pîzeyê mird rakewnê ma ra nîyê’ vist vîrî û hayr ant şarê ke sûkanê rijnayî de yê ser: “Gever, Nisêbîn, Sûr, Cizîr û Şirnex de pitikî pîzeyê maya xo de, cenî, kal û pîrî zî zereyê kuçeyan de amey qetilkerden. Kesê ke nê qetlîaman ra xelesîyay (reynay) ebe veyşanî, bêkeyeyî ra rî bi rî yê. Veng dana herkesî ke pêro pîya bibime jû û dirbetinanê nê însananê xo bipêçime.”
Zekatan bidê cayê xorayverînan
Çîftkûranî vist vîrî ke Aşma Remezan aşma haştî û birabîyen a û va, aşmeke winayî de zî eke ma dirbetinanê însananê xo derman nêkerê, a dirbet geyrena yena ma zî vînena. Çîftkûranî peynî de veng day herkesî ke destê paştdayenî derg bikerê, zekat û fitreyanê xo bidê kampanyaya paştîdayenê sûkanê xorayverînan.
ANF/AMED