Endamê Konseyê Caardişî yê KCKyî Riza Altûnî problemanê Başûrî ser o dîyar kerd ke ancax bi yewîye problemî çareser benî û wina va: “Yewîya neteweyî do vernîya xeylê çîyanê bînan zî akera. Dinya de heme hêzî bîyî yew û wazenî to biqedênî, çîyo ke lazim o bêro kerdene, nîno kerdene. Tam eksê ci yeno kerdene. No zelal o.”
Endamê Konseyê Caardişî yê KCKyî Riza Altûnî derheqê rewşa Îraq û Başûrê Kurdîstanî û Yewîya Neteweyîya Kurdan de qisey kerd û hişyarîyê muhîmî kerdî. Altûnî qiseykerdişê xo de dîyar kerd ke ganî merdim demêko kilm de paweyê çareserîya problemê kurdî de nêbo û bale ant ser krîzê îqtîdarê merkezî û yê herêmî ser.
Altûnî va ‘problemê Îraqî problemanê Rojhelatê Mîyanênî ra yo tewr esasî yo’ û wina domna: “Ganî merdim demêko kilm de paweyê çareserîya problemanê Îraqî nêbo. Cok ra yo ke netîceyê weçînayîşan de bi hawayo rehet hukmat nîno awan kerdene. Hukmat awan bibo zî problemî çareser nêbenî. Îraq mudaxaleyêko cîddî reyde têrî yo. Ewro herkes heme hetanê Îraqî têdano û goreyê xo keno.”
Altûnî qiseykerdişê xo de qala herêma kurdan zî kerd û wina va: “Herêma kurdan de şar perîşan o. Cok ra şar ge-ge vera rejîmî de werzîyeno payan ser. Krîzê hukmatê Başûrî yê hukmatê Îraqî ra giranêr o. Komel de feqîrbîyayîşêko cîddî esto. Meaşî nêdîyenî û reaksîyonê şarî virazîyenî. Mûsil rijîyayo û Dîyala ra heta Tîgrîtî bajarî bîyî xirbe. Şar mîyanê dewlemendîyan de mîyanê feqîrîye de cuyeno. Wina bîyo ke şar nînan ra çareserîye nêpaweno.”
Kurdanê Başûrî vînî kerd
Altûnî dewamê qiseykerdişê xo de wina va: “Kurdî herinda ke nakokîyanê Rojhelatê Mîyanênî biaçarnî firsend, tîya de vînî kerdî. Ewja de sîyasetêko şaş ame kerdene. Ganî qebul bikerî. peynîya zîhnîyetê ke xoserîya xo girêdayeyê hêzanê mîyanneteweyî û herêmî îfade keno, wina ya. Yanî seba ke ê goreyê hêzê xo yê cewherî hereket nêkenî, wina beno. Hertim sewbîna hêzan ra azadîye pawenî. Tîya de ti kes qezenç nêkeno, sîstemê dinya qezenç keno. Hertim hemleyanê şaşan kenî.”
Yewîye estena kurdan reyde eleqeder a
Altûnî qala rewşa nikayîne ya Başûrî kerd û wina va: “Referandûm ra dima problemî her ke şîyî bîyî kûr. Nika her ke şono tengêr beno. Tena rewşa Kerkûkî nê, dîyar nîyo ke averşîyayîşê sîyasî çîyêko senîn bivejî orte. Ma bi desan reyan yewîya neteweyî ard rojeve, çira nêame fam kerdene? Babeta yewîya neteweyî ewro sebebê estena kurdan a. Rayberîya ma verê ra na babete ser o vindeno. No het de sewbîna PKK ti hêz xo nêdano ver. Dinya de çîyêko winasî nêameyo dîyayene. Dinya de heme hêzî bîyî yew û wazenî to biqedênî, çîyo ke lazim o bêro kerdene, nîno kerdene. Tam eksê ci yeno kerdene. No zelal o.”
Nuqtaya esasî yewîya neteweyî ya
Altûnî peynîya qiseykerdişê xo de va ‘ganî kurdî sîstemê Rojhelatê Mîyanênî û dinya de bibî wayîrê fikrêko munasîb. No zî ancax bi yewîya neteweyî beno. Yewîya neteweyî do vernîya xeylê çîyanê bînan zî akera. Heta ke wina nêbo, do hertim şaşî bibî. Ti nêşenî heme çî red bikerî û bibî hakim. Ne Rojhelato Mîyanên nêyî rê munasîb o û ne zî kurdî. Ti nêşenî herkesî red bikerî. Heta ke ti dost û dişmenanê xo yewbînan ra cîya nêkerî, ti sernêkewenî. Eke ti hêzê xo înkar bikerî û hêzê ke to înkar kenî reyde bêrî têhet, ti sîyaset de sernêkewenî. Ganî hêzê kurdan mîyanê xo yewîyêka xurt awan bikerî.”
ANF / BEHDÎNAN