Profesor Gerhard Traberto ke Meclîsê Federalî yê Almanya de qala dîyayîşê xo yê Rojawanî kerd, wina va: “Rojawan herêmêka demokratîke ke baş ameya rêxistinkerdene ya, labelê ambargo ver problemê cidî yê weşîye estî. Cok ra ganî ma înan tena nêverdî.”
Serekê Rêxistina Xizmetê Weşîye û Muxalefetê Feqirîye (Armut und Gesundheit e.V.) Prof. Gerhad Trabert çend rojî verê cû şibi Rojawanê Kurdistanî. Prof. Traberto ke heta nika zaf reyan şîyo herême û seba tedarikkerdişê ganîyîye yê weşîye Rojawan de rayberîya xeylî kampanyayan kerda, Meclîsê Federalî de endamanê Komîsyonê Averşîyayîş û Hemkarîya Ekonomîke ya Meclîsî rê qisey kerd û qala çîyê ke ewja de dîyî kerde.
Kombîyayîşê komîsyonî çapemenîye rê padaye ame viraştene û Profesor Trabertî kombîyayîş de veng da dezgehanê mîyanneteweyîyan. Profesor Gerhard Traberto ke eynî wextî de Unîversîteya Rheîn-Maînî de wezîfedar o, derheqê averşîyayîşê herême ke tehdîtanê dewleta Tirkî ver qewimîyayî de qisey kerd.
Trabertî va ‘dimayê tehdîtanê dewleta Tirkî hûmara cinîyanê ke gede ver şinê 2 qatî zêdêr bîyî’ û wina domna: “Hema vaje her cayê herême de problemê doktoran, psîkîyatrî, malzemeyê tibî û dermanan estî. Tehdîtanê hêrişî yê dewleta Tirkî ver nêeşkenî bi temamî xizmetê weşîye bikerê.”
Problemê cîddî yê weşîye estî
Profesor Trabertî dewamê qiseykerdişê xo de bale ant problemanê weşîye ser û wina va: “Kêmaneyanê mudaxeleyî yê tibî ver destpêkê şerî ra nata mîyanê 200 hezar û 300 hezar merdiman wefat kerd. Ganî hukmatê Almanî yo Federalî hetkarîya Rojawanî bikero. Têna vakurê Îraqî ra merdim eşkeno xo biresno herême. Bitaybetî tedarikkerdişê malzemeyî yê weşîye de problemê cidîyî estê. Hetkarîya ke yena erşawitene ya yena astengkerdene yan zî erey resena herême.”
Prof. Trabertî peynîya qiseykerdişê xo de veng da hukmatê Almanî û welatanê Yewîya Ewropa û wina va: “Bi tedaya sîyasî ya vera Tirkîya ya ke NATO de endamê şima ya, meverdê ke wa hêrişê Rojawanî bikero. Ganî tehdîtê ke herême de benî sebebê ters û qesawetî, bêrê caverdene.”
ANF / BERLÎN