Alewîyê Gurgum’î zî planê kamp û fabrîka ser qerqîzyenî. Alewî fikrîyenê ke çeteyê DAIŞ kampê AFAD de bimanî û vera alewîyan qirkerdî virazê. Dorûverê Gurgumî tewr weş randiman arazîyê Deştî yê Pazarcixî danî. Deştê Pazarcixî de tewr zaf alewîyê kurdî cuyenî û demê ke derg o dewleta tirkî wazena no deştî vila bikero. 2006 de viraştişê fabrîkaya çîmento ra ame destpa kerdiş û bi nê fabrîkayan zî Deştê Pazarcixî de qirkerdişeko gird viraziya. Nika zî yeno waştiş ke Deştê Pazarcixî de Heremê Sanayî yê Organîze û kampê AFAD bêrê viraştiş.
‘Çima sûk de kampî virazenê?’
Hewna zî kurdê alewî xo ser ra travmayê Qirkerdişê Gurgumî yê serra 1978 nêeşto. AKP wazena bi nê projeyan demografîya Deştê Pazarcixî bibedilna (vurniyo) û nifûsê kurdê elewî kêm bikero. 16 muxtarê dewe û temsîlkarê sazîyê sivîlî bi kampanyayan kampê AFAD’î ra nêrazîbiyenê xo damusnay. Kurdê alewî ke dewê Pazarcixî de cuyenî, planê kampî, projeyê fabrîkaya çîmento, heremê sanayî û tesîsê çopî ra cîya nêvînenî, çimkî fikrîyenî bi na projeya kampî de armanc koçkerdiş o.Kurdê elewî persenî çima (qey) cayê koyî ra nê, nezdiyê sûk de kampê AFAD virazenî.
Çeteyê DAIŞ û AKP
Babete ser wekîlê HDP yê Dîlok’î Mahmut Togrul wina va: “Farqîn, Sûr, Cizîr, Nisêbîn, Şirnex, Gever û Hezex de dûştê kurdan çeteyê AKP û DAIŞ teror meşnenî û vîrdozîya nê çeteyan zî nîjadperestîya îslamgerî ya. AKP dûştê kurdan bi sentezê tirkperestîye şer aver bena. Kampê AFAD zî çarçoveyê no hedefî de xebityenî. Çeteyêkî kampê AFAD’î de mendî vat ke hetanê Tirkîya hetê înan de bo, ê dê vera kurdan reyde şer bikerî.
Kampî rê destûr nêdanime
Dûştê projeya AKP yê kampê AFAD bi rayberîya cenîyan xoverdayîşê xo domnenî. Çend rojiyo ke cenîyê alewî him nobedê xêmî de ca gênî, him zî nanê ke banê xo de virazenî nûmayişkaran reyde bar kenî. Cenîya alewî Meryem Delîeter babete ser o, va: “Ma tesilî deştê elewîyan de çeteyê DAIŞ nêwazenî û seba vergirewtişê kampî zî destê ma ra çi bêro, ma dê bikerî.” Done Kocamer zî ard zo ke, na problem, tena problema alewîyan nîya, problema pêrokîn Gurgimijan a.
JINHA/GURGUM