SEMRA TÛRAN / MA / DÊRSIM
Demêko derg o ke dewlete hewl dana Çimeyanê Mizurî ke seba şarê Dêrsimî ra pîroz yeno dîyayene, tûrîzmî rê akera. Projeyo ke hetê Ajansê Averşîyayîşî yê Firatî ra amebî amadekerdene, hetê dezgehanê dewlete ra amebî qebulkerdene. Dima ra muhtewaya projeyî dîyar bî.
Çarçewaya projeyî de herçiqas ke ameyo vatene ke çîyê ke bêrî viraştene do ahşab ra bibî zî, do Çemê Mizurî ser ro pirdê çulikinî bêrî awankerdene. Reyna do 2 otoparke ra yewe do hetê çimeyan de bêra viraştene. Yeno famkerdene ke eke proje temam bibo, dima ra kewtişê ware bibo pereyin.
Serekê Şaredarîya Pulurî ya CHPyî Mustafa Sarigulî projeyî ser o va ‘eke proje bikewo fealîyet, o wext do Çimeyî çin bibî’ û wina domna: “Ganî ewja de viraştişê awanîyan qedexe bibo. Eke proje bikewo dewre, o wext do çimeyî nêmanî. Ma projeyêko şenik yê barajî reyde têrî yî. Ganî çimeyê awe bêrî pawitene. Tayê kerrayê herêmanê bînan bîyarî tîya, o wext orîjînalîya tîya vinî bena.”
‘Ma do destûr nêdî ke bikewo fealîyet
Sarigulî va ‘Çimeyê Mizurî seba elewîyan cayê îbadetî yo’ û wina va. “Cok ra projeyê ke yenî viraştene hetê şarî ra nînî qebulkerdene. Ma goreyê bawerîya xo herre û tebîet ra destûr wazenî. Cok ra ganî projeyê winasî bêrî şarî ver û waştişê şarî bêro esasgirewtene. Akerdişê tûrîzmî rê yeno manaya texrîbkerdişî. Seba tûrîzmî ganî binge bêro awankerdene. Ma nêwazenî ke ewja tîcaret rê bêro akerdene. Ma do vera no proje de bivinderî û destûr nêdî ke bikewo fealîyet.”