Makîna propaganda yê dewleta tirkî onca dest kerd ci gureyena. Na makîna vana “mesela kurdî sero qesey beno, muzakere bena.”

Vaydanê onca! Grevê vêsaniye ra dima, hukumatî mesela zonê mayande pawitene meclîse de gurete dest. Hukumatî wast qanunode tirkevarî amade kero. Nika da vindarnayene.
Qanun de taye xalê henenî estê ke, huyayîsê mordemî yeno. Mesela benê hakîm ra giredanê, yanê eke hakîmî wast na heqe dano, eke nêwast nêdano.
Heto bîn ra kam ke wazeno zonê xo de xo bipawo, gunê masrafê raçarnayene ebi xo bido. “Heqa “ ke dewleta teroriste dana, na wa. Qanun nika rêfê meclisa tirkî de hewndero û kanbiyayena xo pîno.
Hurênda halkerdena mesela de serokwezîrê dewleta tirkî wedardayena pêskar nêbiyayîsê mebusanê BDP kerde rojdemê xo. Halkerdîs bi tirkî!
La onca zî çapemeniya tirkî û tayê kurdî naye de xêr vînenê. Gorê nînan, vatîsê Erdogan vatîsê tol yê, peyê pêruge de mesela sero qesey beno. Werrekna! Werrekna!!
Gorê taye mezgsenikan zî, operasyonê qirkerdena siyasî halkerdena mesela rê xizmete kenê.
Heşto peye ebi name Muhsîn Kizilkaya jû colemêrgiz vejiya televîzyonê tirkî, sermiyanenya pêro meselan este kurdan ser. Gorê Muhsîn begî, vatîsê Erdoganî “qomê ma îdam wazeno” wedardayena pêskar nêbiyayena mebusanê BDP û operasyonê qirkerdena siyasî, qesê tol yê, yanê Erdogan raştiye de niya nêfikrîno.
Wille raştiye de eke deste bera Erdogan bêro, verecoy kurdê ke serbestiye wazenê înan xebekneno, dima jî mordemunê jê Muhsîn begî. Çike tarîxê tirkî de hertim niya biyo.
Pekî mordemo ke haştiye wazeno qe niya qesey keno Musîn beg!!
Pereyî belka pîzê mordemî kenê mird, royê mordemî mird nêkenê, Musîn beg. Erdoganê to ke haştiye wazeno, ça mesejanê faşîstkî dano û qomê xo ça honde tizkeno! Ala vaze Mushîn beg kamij dugele de haştiye bi nî vatîs û kerdîsanê faşîstkî ama.
Onca Muhsîn beg vat ke, birayê rayverê qomê kurdî Abdullah Ocalan, Mehmet Ocalan rojnama “Akşam” de vato, birêz Ocalan vato miyanê 10-20 rozan de çiyê rindî benê.
Grevê vêsaniye 18ê mijdare de qediya. Na mavênra ha wa asme vêrde ra. Nî çiyê rindî yê hukumatê to kotî manenê, Muhsîn beg!
Makîna zur û dêkudolavan onca dest kerdo ci şaqur-şûqur gureyena.

***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.