Serrgêra 5. yê qetlîyamî de heta nika ti kes nêameyo mehkemekerdiş û ceza nêdîyaya ti kesî. 29ê gulane 2016 de zî 2 ciwanê roboskîyijî bi topê obusî ke qereqolî ra amebî eştiş, amebî qetilkerdiş. Bombardiman 28ê kanûne 2011 de saet 23:00 de qewimîyabî la heta roja bîn saetanê nîmeroje medyaya hetgir de nêame dîyayîş.
Qetlîyam şarî ra ame nimitiş
Serokwezîrê o wextî Erdogan îzehetê xo de medyaya hetgir rê seba ke nêdabî, sipasîya xo kerdbî. Heyeto ke 30 kanûne de şîbî cayê hedîseyî, îzehet dabî û vatbî ‘yê ke merdî, bi tîcaretê sînorî eleqeder bîyêne û xebera qereqolî zî nê tîcaretî ra estbîya.’ Qetlîyamî ra dima tena albayêk karî ra ame dûrîvistiş û derheqê 17 leşkeran de zî tehqîqat dîya destpêkerdiş. Heyetê Meclîsî ra Parlamenterê AKPyî yê Ordu Îhsan Şenerî îzeh kerdbî ke îxtîmal esto ke talîmatê qetlîyamî Fermandarîya Pêroyî yê Artêşî dayo. Dozgerîya Komare ya Amedî zî dosya erşawite Dozgerîya Leşkerî. Dozgerî heta nika tena çend dezgeyan ra belge waşto. Serheng Duran Îspîro ke roja hedîseyî de wesayîta bêmerdimî xebetnayêne, îfadeya xo de dîyar kerdo ke sereyî ra heta peynî yeno zanayîş ke nê kesî qaçaxwan î. Dozgerîya leşkerî qerarê ‘tehqîqatî rê lazimî çin o’ dano.
Proses hema zî dewam keno
Dima ra keyeyê mexdûran qerar rê îtîraz kenî û muracatê Mehkemeya Qanûno Bingeyî kenî. Mehkeme derheqê hedîseyî de qerarê ‘tehqîqat rê lazimî çin o’ dano. Nê qerarî ra dima bi seyan avûkatî bi hawayo şexsî muracatê mehkeme kenî û wazenî ke Heyetê Wezîran bêro mehkemekerdiş. Mehkeme seba ke nê avûkatan ra wekaletnameyê 3 kesan çinêbî, qerarê redî da.
Tewr peynî Parlamenterê HDPyî yê Şirnexî Ferhat Encuyî dosya kirişt Mehkemeya Heqê Merdiman yê Ewropaye û proses hîna zî dewam keno.
ŞIRNEX