Stratejîya HDPyî ya ke di bingeyan ser o netîceyê weçînitişê 31’ê Adare bewlî kerd, bi nê hawayî bi. Na stratejîye waştêne ke Vakurê Kurdistanî de qeyûmanê kolonyalîstan biqewerno û metropolanê Tirkîya de zî îqtîdarê AKP-MHP’yî û sazîyanê înan ê dînperest-nîjadperestan bin fîno, zafane bi ser kewte.
Îqtîdarê AKP-MHPyî dest ra şîyayîşê paytextê Tirkîya qebul kerd, la vînîkerdişê Stenbolî qebul nêkerd. Stenbol bi nufûs û awanîya xo wayîrê ekonomî û kulturêkê giranî yo. Sey cayê transferê sermayeya teberê exlaqî ameyêne dîyêne. Seba ke Stenbolî rê payeyê ‘bajarê pîrozî’ yê bidinyaameyîşê yew şexsî ameyêne dayene, vînîkerdişê Stenbolî ameyêne manaya ‘mergê sîyasî’. Naye ra înan huqûq û qanûn da hetêk û weçînitişê Stenbolî newe ra viraşt.
Bêguman tewirê HDPyî, tewirê Kurdan netîceyê weçînitişî de dîyarkerdox bi û no nêeşkeno bêro înkarkerdene. Stratejîya HDPyî nêvurîya; seba ke reyna AKP-MHP bêro binfînayene hemserekê partîye, parlamenterî, hemşaredarî, organîzasyonê HDPyî yê bajarî û qezayan pîya bi heme sazîyanê xo xebetîyayî. Îqtîdarê AKP-MHPyî seba ke sebebê binkewtişê xo yê 31ê Adare zanayêne dest bi bikarardişê ziwan û pratîkêkê dihetî kerd. Hetêk ra tabelayê Kurdkî ardî warî; hetêna ra namzedê xo berd heta Amed û bi şekilê ‘mebûsê Kurdistanî’ muracatê hîleyan kerd. Hetêk ra seba dagîrkerî hêrişê Xakurkê kerd; hetêna ra zî bi qedînayîşê tecrîdî yo ke bi xoverdayîşî bi kerd ke zûra ‘şerê mabênê Îmrali-Qendîl-HDPyî bido bawerkerdene.
Tesîrê xurtî yê Kurdan dîyar kerd
Tîfaqê AKP-MHPyî vizêr Stenbol de bin kewt. Îqtîdarê 25 serran ê Erdoganî, îqtîdarê 17 serran ê AKPyî û îqtîdarê 4 serran ê MHPyî Stenbol de bin kewt, bi ferqê se ra desî, yanî bi heşt sey hezar rayan bin kewt. Îqtîdaro mewcûd bi tesîrê Kurdan ê xurtî verê berê mergî de yo. Beno ke îqtîdarêko bi nê hawayî fek dişmenîya Kurdan ra vera nêdo û hîna bi hêrişkarî tê bigêro. Prosesêko newe yê sîyasî û merheleyêka newî ya têkoşînî dest pêkena. Çîyo ke HDP û pabesteyê ci bikerê zî bicaardişê stratejîya heman têkoşînî yo.
ANF / BRUKSEL