Qederê kayanê tragedyayan her dolime newe ra xerepnayêne û azadîye ser açarnayêne, her janî merdimî rê dano antêne û dîyaxa merdimî keno zixm. ez bi dawa xo û bi hevalanê xo ra pîya na dolime kayo ke rastîye bi xo ya ma kayî kerd û para qederî rê binkewtêne kewte… A.O
Tarixê komalayan de homa-qralan bi şikil-form vurnayîş estbîyayena xo ramita. No gegane yew kes bo zî zîyaderî sey pergalî vejîno ma ver û her tim qurban û gonye ra dot rol nêdo merdimahîye. no qeyde tewr nêvurîyo û bi qederî zî ameyo mohr kerdêne.
Û merdiman seba ke kesê sey xo rê nêbê kole her dem serê wedarito, mohr şikito û seba ke ciwîyayîşî newe ra avan bikero xover do. La heta ewroyê ma pêroyê îsyanî hîna ke mohr nêamo şikitenê dest nîyo ser û bi ters û xofî merdimahîye teslîm ameya girewtêne. Bi yew formê gergalê neweyî merdiman bi zerrîweşîye qurban bîyayenê serî ra na het qebul kerda. Mohrê qederî wina bi gonya xo ra girê dayo ke waşto ke wa tewr nêvisîyo.
Dûştê naye de îsyanî her hetê dinyaye de bi cîya reng û bi cîya vengan xo rê ca akerdo û dewam kerdo. Nêçê can û wêrekî seba ciwîyayena newîya ke nameyê xo azadîye ya kewtê rayîr û nêwaşto ke qederî rê binkewtêne ra dot şans bimano. No rayîr o zor û zehmet de dûştê tragedyayan de mucadeleyanê xo ra fek ranêverdo.
Hêvî zî tam tîya de yo. Çi merdimê hêcayî her hetê dinyaye de hayîgê yewbînanê la tewr yebînan de nêameyê têrî û seba azadîye û ciwîyayena newîye can do ke wa erd ra vîlê xoverdayîşî biroyîyê. Sey vatena şaîrî: ê hêvîyê dinyayê pêyenî û bomê ke ezbeta xo birîya, la ciwîyayenê her çar koşeyê dinyaye de, say ke merdene rê tinazî bikerê, kotî de ke ameyî waştenê uca de bîyî,tewr yew dolime zî hereyî nêkewtî emrê xo de… A. Tellî
Erdê kurdîstanî de 40 serrî yo ke bi şîarê „heqîqete eşq a eşq ciwîyayîşo azad o“ xoverdayîş dewam keno û ewro no xoverdayîş rojhilato mîyonen de her şarî rê rayîrberîye keno. Ewro ney xoverdayîşî ters kerdo zerê Homa-qralan.
Hukimatê 21 îna û homa-heqî pîya ney îsyanê 40 serreyî ser kenê ke rayîr bibirnê û seba naye zî bi pêroyê hêza xo gale ci kenê. Xoverdayîş 40 roja ke berdewam keno û bi qedexeyê tever vejîyayîşî, bi kîştêne û bi polîtîkayanê qirkerdişî kenê ke ney xoverdayîşî bixendeqnê la şar her wextî ra hîna zêde payan ser a yo û xoverdano.
Çike şarê kurdî; Zey ke serekatîye vato, zano ke qeder binkeweno û o mohro ke hêza xo ters ra gêno êno şikitêne. Nayê ra zî merdene rê tîlîlîye ancenê û meyîtê xort û azebanê xo bi heneyî kenê rayîr….
Yanê erdê kurdîstanî cayo ke pû yê Minerva bi firdayîş zanoxîye û roşnîye vila bikero ca nîyo. zanoxîye-kamilîye zî azadîye zî fam bîyayêne ser nêvindena û xoverdayîşî de şansê ciwîyayêne vînena û heqîqete her roja newîye ma newe ra kena heşar…