Hemserekîya Konseyê Caardişî yê KCKyî îzehetê xo de vato ‘şehadetê her di embazan de ameyo dîyayene ke MÎT Başûr de zaf rêxistinbîyaye yo’ û wina dewam kerd: “Ti cayêko bîn de çîyêko winasî çin o. Wa bêro zanayene ke PKK tevgerê hesabperskerdişî yo û do qatilan ra hesab biperso.”

Hemserekîya Konseyê Caardişî yê KCKyî derheqê şehadetê Seyîtxan Ayaz (Demhat Egîd) û Eser Irmakî (Cemîl Amed) de îzehetêko nuştekî pare kerd. Hemserekîye dîyar kerdo ke dewleta Tirkî bi teyarayanê bêmerdimî bi hawayo korsan 2 şorişgêrê ke endamîya Konseyê Caardişî yê KCKyî kerdo, qetil kerdî.

Hemserekîye îzehet de vato ‘ma her di hemrayanê xo bi rêzdarî vîr anî û ma do xeyalanê înan pê bîyarî’ û wina dewam kerd: “No hêriş vera Tevgerê Azadîya Kurdan de nê, vera îdareyê Başûrê Kurdîstanî û Îraqî de ameyo kerdene. Par Şengal de zî Mam Zekî amebi qetilkerdene. Reyna 2013 de Fransa de 3 cinîyê şorişgêrî ameybî qetilkerdene. Heme hêrişan de engîşta MÎTî esta. MÎT bîyo rêxistina cînayetî. Dewleta Tirkî yewna reye dişmenîya xo nîşan da.”

Hemserekîye dayo zanayene ke no hêriş zî nîşan dayo ke MÎT Başûrê Kurdîstan de zaf rêxistinbîyaye yo û wina dewam kerdo: “Na seba îdareyê Başûrê Kurdîstanî zeyîfî ya. Ti welatêko bîn de çîyêko winasî nîno dîyayene. Ganî îdareyê Başûrê Kurdîstanî mudaxaleyê nêyî bikero. Tena rexistinîya MÎTî nê, xeylê cayan de qerargehê înan zî estî. No seba Başûrî tehlukeyêko gird o. Êdî wext ameyo ke Kurd, hêzê sîyasî û îdareyê Başûrî nînan Başûrê Kurdîstanî ra vejo.”

Şarê ma do destûr nêdo xayînan

Hemserekîye qala rêxistinîya MÎTî kerda û wina vato: “Îdareyê Başûrî zano ke PDK û YNK mîyanê rêxistinîya MÎTî de ca gênî. MÎT û hemkarê ci yê herêmî bi desan qerîlayî qetil kerdî. Hêrişê Silêmanî zî nîşan dano ke muxbîrî herêmî estî. Xayînê winasî Başûr de yî û no merdimî dejneno. Şarê ma vera MÎT û hemkaranê ci de hêrsin o. Şarê ma yê Başûrî do destûr nêdo nê xayînan. Ganî Îdareyê Başûrî sere de vera PDK û YNKyî û rêxistinîya MÎTî de cewabêk bidî.”

Boykot têkoşînêko muhîm o

Hemserekîye bale ante qerarê boykotkerdişê malê Tirkan ser û wina va: “Şarê ma Başûr de vera hêrişê dagîrkerîye yê dewleta Tirkî de qerarêko muhîm girewto û malê Tirkan boykot kenî. Dewleta Tirkî ekonomîya xo Başûrê Kurdîstanî ser ro îdare kena. Dewleta Tirkî çîyê ke Başûrî ra qezenç kena reyde Kurdan ser o zextan kena. Cok ra ganî malê Tirkan nêrî herînayene. Roja ma de alternatîfê her çîyî esto. Ganî şarê ma tena bi boykotî nê, bi ruhê Şeladizê têkoşîn bido. Wa şarê ma yê Başûrî heme beşdarê merasîmê oxirkerdişî yê Demhat û Cemîlî bibî û cewab bidî dewleta Tirkî.”

Ancax bi yewîye hêrişî veng vejenî

Hemserekîye peynîya îzehetî de qala muhîmîya yewîya Kurdan kerda û wina vato: “Îttîfaqê AKP û MHPyî dişmenê Kurdan o û Kurdan qir keno. Eke firsend bivîno do mehneyêk bivîno û hewl bido qezencanê Başûrê Kurdîstanî zî wedarno. Xora hertim dîyar kenî ke ê şaşîya ke Başûr kerda, Rojawan de nêkenî. Ma ancax bi yewîye eşkenî nê hêrişan veng bivejî. Ganî seba yewîya neteweyî komîteya amadekare înîsîyatîf bigîro û xebatan bido destpêkerdene. Wa bêro zanayene ke PKK tevgerê hesabperskerdişî yo û do qatilan ra hesab biperso.”

 

ANF/BEHDÎNAN