Qirkerdişê Roboskê yo ke 28ê kanûne 2011 de qewimîyabî û netîceyê ci de 34 sîvîlî ameybî qetilkerdiş ser ra 5 serrî vîyartî û hîna zî gêrayîşê edaletî dewam keno.
Babete ser o Endamê Meclîsê Dayîkê Aştîye yê Wanî Zekîya Kaya, Hanîfe Koçake û Kewe Işike qisey kerdî.
Dayîke Zekîya Kayaye va ‘qatilê Qirkerdişê Roboskê dîyar î û ganî nê qatilî bivejyî vernîya mehkeme û hesab bidî’ û qiseykerdişê xo wina domnaye: “Emîne Erdogane ameybî hetê dayîkê roboskêyijan û bermaybî. Ma dayîkî hêvî kerdênê ke bi ameyîşê Emîne Erdogane do qatilê qirkerdişî bêrî dîyayîş. Labelê ma dîy ke Emîne zî sey Serokkomar Erdoganî tena zîyaret kerde û sewbîna zî çîk nêkerde.”
Sipasî ameye kerdiş
Dayîke Hanîfe Koçake zî va ‘wexto ke babete bena kurd, polîtîkayê qirkerdişî ra vîşêr sewbîna çîk nêbeno’ û qiseykerdişê xo rê wina dewam kerde: “Seba ke edalet cayê xo bivîno, Ma dayîkî 5 serrî yo ke qîrenê, la heta nika ti netîce nêameyo girewtiş. Dewlete ma ra baş zanayênê ke yê ke ewja de bî, PKKyî nêbî û sîvîlî bî. La her çiqas ke hende baş zanayêne, reyna zî bombe varnayî înan ser de. Hedîseyî ra dima dayîkê ke zerrîya înan veşaye, veradayî. Dewlete efûya xo daxî nêwaşt, yê qirkerdiş viraştî, xelat dîya qatilan.”
Dewlete se kerde?
Dayîke Kewe Işike zî va ‘dayîkê roboskêyijî bi cilanê sîyayan paweyê edaletî yî’ û qiseykerdişê xo wina qedênaye: “Ma hêvî kenî ke serra 2017 do seba Roboskê biba serra edaletî. Madem edalet est o, o wext qatilê ke Roboskê de hende merdimî qetil kerdî, kura de yî? Edalet nîno Tirkîya. Eke qatilê Roboskê biameyênê dîyayîş, o wext cêrzemînê Cizîrî de hende merdimî nêameyênê veşnayîş. Domananê ma çimanê ma ver de kişenî. Ma êdî nêyî qebul nêkenî. Ma do heta peynî seba Roboskê do edalet bigêrî.”
ŞÛJIN / WAN