Qezaya Sûrî ya Amedî de wextê qedexeyê tebervejîyayîşê kuçeyan de her roje seba ke abluqa bêro şiknayîş, çalakîyî ameyênê viraştiş. 22ê kanûna 2015 de Şîyar Barano 16 serreyî zî bi guleyêko wesayîtê bi nameyê ‘Ranger’î ra amebî panayîş ver merdbî. Heta nika derheqê hedîseyî de ti kes nêameyo mehkemekerdiş û cezakerdiş.Babete ser o keyeyê Baranî ra dayîk û birayê ci qisey kerdî.
Dayîke Asya Barane va ‘dewlete domanêko şenik rê vana terorîst’ û wina dewam kerde: “Çi sucê lajê mi estbî? Kişîyayîşê lajê mi ser ro serrêk derbaz bî, la heta nika ti kes nêameyo mehkemekerdiş. Ez zana ke lajê mi peyser nîno, labelê ez wazena ke wa qatilê ci bêrî dîyayîş.”
Hişê mi ra nêşono
Birayê Şîyarî Muhammeto 10 serreyî zî wina va: “Wexto ke merd, ez şîya hetê ci. Mi vatênê qey mi ra ewnîyeno. Qet hişê mi ra nêşono.”Embazanê Şîyarî ra Erhan Keskînî zî va “Ma tim nê ziqaqan de top kaykerdênê. Ez zaf bêrîya ey kena.
ŞUJIN / AMED