Badê ke qayûmî tayînê şaredarîyanê DBPyî bîyî, nê qayûmî her roje herişê kultur, ziwan û tarîxê kurdan kenî. Qayûmî heta nika tabelayê ke bi kurdî ameybî nuştiş ardî war, abîdeyê kesanê muhîman yê kurdan rijnayî, sazî û dibistanê ke bi ziwanê kurdî ders dayênê, padayî û sewbîna xeylê çîyan kerdî.
Na rey zî qayûm Ferhat Vardaro ke tayînê Şaredarîya qezaya Qelqelî ya Wanî bîbî, camîyê ke nizdîyê keyeyê ci yî, ê camîyan de wendişê selaya şanî qedexe kerd. Heto bîn ra qayûmî caddeyo ke bînaya Qeymeqamî û Edlîye esta, trafîkî rê pada û wexto ke esnafan vera nêyî de îtîraz kerd, esnafan ra va ‘şima nêyî herinda wexto ke şima dikananê xo padayênê rê bihesibnê’.
Sey ke yeno zanayîş goreyê dînê îslamî wexto ke kesêk merd, heta ke selaya ci nêwanîyo, defin nêbeno. Badê ke sela ameye qedexekerdiş, keso ke bimiro ganî heta serê sibayî saet 07:00 bêro vindarnayîş. 1ê êlule de qezaya Qelqelî ya Wanî de merdimê keso ke merdbî muracatê Muftîtîye kerdî ke selaya înan bêro wendiş. Labelê muracatê înan bi vatişê ‘qayûmî şewe wendişê selaye qedexe kerdo’ame redkerdiş.
Karê dînî goreyê îqtîdarî benî
Babete ser o Serekê Meclîsê Şaredarîya Bajarê Girdî ya Wanî Cahît Bozbayî qisey kerd û reaksîyon nîşan da. Bozbayî va ‘merdim nêşeno nê qedexeyî aqilî reyde îzeh bikero’ û wina dewam kerd: “Qayûm şaredarî de qayûm o, Qeymeqamî de qeymeqam o û Walîtî de zî walî yo, labelê ziqaq de çîyêk nîyo. Tirkîya de karê dînî, goreyê Quranî nê, goreyê polîtîkayanê îqtîdarî şekil gênî. Tîya de yê ke beno mexdur şar o. Goreyê bawerîya ma merde nîno vindarnayîş û heta ke sela nêwanîyo defin nêbeno.”
Şarê qezaye zî dîyar kerd ke seba ke mabênê camî û bînaya qeymeqamî de mesafeyêko kilm esto, qayûmî qerarêko winasî girewto.
ANF/WAN