Xêlê cayanê Awrûpa de serragêra ronayişê PKK bimbarek bî. Seba ke PKK 1993î de hetê Almanya qedexe bî, 1997î de Amerîka de û 2002 de zî Yewîya Awrûpa de girotîya ‘lîsteyê terorî’ Kurdistanijan waştî ke PKK lîste ra bîro vetiş û qedexe wedarîyo. Sûkanê Almanya de bi wesîleyê serragêr rayşîyayiş, mitîng û şahî virazîyay.
MUNCHEN: Sûka Almanya Munchen de serragêra 23. yê qedexeyê ser PKK yê Almanya rayşîyayişeke virazîya û Kurdistanijan veng da dewleta Almanya ke qedexeyê ser PKK wedarnê.
Nûmayişa ke hetê Cenîyê Ciwan û Ciwanên Azad virazîya de vera bîyayişê PKK lîsteyê teror rê nêrazîbîyen damûsnîya. Nûmayişa ke komanê çepger ê Alman zî desteg day de sloganê zey “Kiştox Erdogan" qîr bi. Qiseyan de vajîya ke ser waştena Tirkîye ke bi Almanya ra têkilîyê ci yê ekonomîk û sîyasî estê, xebatê PKK ê Almanya amey qedexe kerdiş û wazîya ke PKK lîsteyê terorî’ ra bîro vetiş.
Rejîma Erdoganî tersena
HAMBÛRG: Sûka bîn yê Almanya Hambûrg de zî serragêra ronayişê PKK de şewa bi poştdayişê şarê Bakûr organîze bî. Şewa ke bi seyan Kurdistanijî tewr bî de Verfekê KOMAW Ahmet Aktaşî qisey kerd û vist vîrî ke dinya de lîderê zey Fîdel Castro, Che Gûevara, Mao vejyay, la kesî seba înan xo feda nêkerd û hayr ant rol û raştîya Rayverê Şarê Kurd Abdullah Ocalanî ser. Aktaşî da zonayen ke rejîma Erdoganî Şoreşa Rojawayê Kurdistanî ra zaf terseno û cok ra hêriş keno. Bimbarekîn de herzewbîn Koroyê Domanan, koma Rengê Nû, Zozan Zûdem, Atîlla-Îbo û Garîp Dost ra pîya Koma govenda Sîpan Amara zî vejyay ser sehne.
STOCKHOLM: Paytexta Swêd Stockholm de zî bi waştena ‘lîsteyê terorî’ ra vetişê PKK rayşîyayiş û mitîngeke virazîya. Kurdistanijê ke Meydanê Sodermalm de are bî, bi flamayê PKK û sloganan heta Meydanê Medborgarplatsen ray şî. Ser nameyê Navenda Civaka Demokratîk yê Kurd Ayşe Goktepe damûstayîn da. Damûstayîn de vajîya ke bîyayişê PKK lîsteyê terorî de raya viraştişê qirkerdişan yê quwetanê zey DAIŞ-AKP akeno. Goktepe da zonayen ke PKK dûştê sîstema patriyarkal, nîjadperest û îslamîyeta radîkal de civakekê û demokrasiya pluralîst keno hedef .
Felsefeyê ciwîyayişî damûsna
DARMSTADT: Jew cayo bîm ke serragêra PKK bimbarek bî Darmstadt bi. Sûk de bi tewrbîyayena hezar kesan şeweke virazîya. Parlementerê HDP Faysal Sariyildiz zî tewrê şewe bi û aşkere kerd ke tekoşînê Kurdan do tewr peynî de mîyaneyê dewleta Tirk bişikîno. Sariyildizî şarî ra waşt ke hona vêşêr wayîrê partîya xo bivejyê.
DÛÎSBÛRG: Şewa ke virazîya de bi seyan kesî tewr bî. Ser nameyê TJK-E Ronahî Pazarcik qisey kerd û vist vîrî ke PKK felsefeyê ciwîyayişî yê şarê Kurd vûrna û tekoşînkerdişî damûsna.
KOLN: Bimbarekîna Koln Bergisch Gladbach de virazîya û sûkanê çorme Aachen, Duren, Leverkusen, Bergîsch Gladbach, Gumersbach û Bergheîm ra zî Kurdistanijî tewr bî. Hemserokê KCDK-E Yuksel Koçî şahî de qisey kerd û waşt ke qedexeyê PKK wedarîyo. Qiseyan ra dima sînevîzyono ke qiseyanê Rayverê Şarê Kurd ra ame hadrekerdiş damûsnîya. Herzewbîn Ozan Canê, Serdar Azad, Erdogan Emîr, Rojda û koma Govenda Baran zî şahî de sehne girewt.
‘PKK şar o’
Zewbîn zî sûkanê Almanya, BONN, HALLE, BREMEN, MANNHEIM, FREÎBURG de zî bi tewrbîyena hezaran kesan bimbarek bî.
Sûkanê FRANSA RENNES, STRASBOURG, MARSÎLYA de zî 38. Serragêra PKK bi coşeke gird bimbarek bi. Nê cayan de zî wazîya ke qedexeyê ser PKK wedarîyo.
GRAZ: Sûka Awûstûrya Graz de zî bi wesîleyê serragêr Kurdistanijî are bî. Bimbarekîn de qiseyan ra pîya bernameyê muzîk zî estbi. Kurdistanijan bi govendî heta seatanê şanî ronayişê PKK bimbarek kerdî.
Sûka Îtalya TORÎNO, Paytextê Îskoçya EDÎNBÛRG, Sûka Avustralya MELBOURN, Paytexta Fînlandîya HELSÎNKÎ, Paytexta Îngilîstan LONDRA de zî Kurdistanijan û dostanê ci bi slogana “PKK şar o, şar tîya de yo” serragêra ronayişê PKK bimbarek kerdî.
NAVENDÊ XEBERAN