Parlamentero kehen yê HDPyî Îdrîs Balûkeno ke 2 serrî ra zêde yo ke tewqîfkerde yo, dîyar kerd ke ê hertim hewl danî vera yê ke wazenî vengê înan bibirnî de bi qelema xo cewab bidî û wina domna: “Wa herkes bizanbo. Ziwanê ma yo ke hertim qala heqîqete kena, do qet bêveng nêbo.”

Parlamentero kehen yê HDPyî û Wekîlê Hemserekîya HDPyî yo kehen Îdrîs Balûken 21ê Sibata 2017î ra nata tewqîfkerde yo. Balûken weçînayîşê 24ê Hezîrane ra ver bi hawayo lez 9 serrî 2 aşmî cezaya zîndanî dîya ci.

Balûken heta nika zîndan de bi nameyê ‘Uç Kirik Dal’ û ‘Oko’ de 2 kîtabî nuştî û hîna zî no het de berardişê xo domneno. Balûkenî bi mabênkarîya avûkatan cewab dayo persanê rojnameyê Gazete Duvarî ra Soner Sertî.

Balûken dîyar kerdo ke sîyaset û huner 2 bedenê ke eynî ruhî xo de kirişenî yî û wina vato: “Her di bedenî seba resayîşê amancî 2 metodê cîya yî. Sîyaset de hêzê çalakîyan, huner de zî hêzê berardişî tesîrîya nê metodan nîşan danî. Donemê tewr krîzin yê tarîxê merdimîye de daxî hunerê berardişî omid ganî tepişto. Qezencê merdimîye saya naye de vejîyayî werte. Ez eşkena vaja ke prosesê berardişê ‘Oko’ zî wina vejîyayo werte. Mi o kîtab de wexto ke qala qetlîyamê Hayirsiz Ada kerda, mi waşt ke ez bale bianca dîyalektîkê azadî û esîrîye ser.”

Huner hîna asan xo resneno merdiman

Balûkenî vato ‘huner goreyê sîyasetî resayîşê merdiman de hîna avantajin o. Çimkî ti hêz qasê hunerî nêşêno xo biresno kesê ke fikrê înan cîya yî. Çimkî sîyaset heta cayêk eşkeno xo biresno merdiman, ci ra dima beno ke pêşdaraz vernîya ci de bibo asteng. Labelê huner eşkeno bi vatişêk yan zî bi vengêk nê astengî derbaz bikero. Ez wazena ke merdimî bala xo bidî karakterê ‘Oko’. Oko ge sey kutikêk, ge sey şorişgêr, ge sey aşiqêko romantîk û ge-ge zî sey qehremanêko aşiqê azadîye yo.”

Çareserîye ancax bi agêrayîşê komelê dayîke mumkin a

Balûkenî derheqê çareserîya problemê ke sîstemî ver vejîyayî de wina vato: “Ewro kapîtalîzm wina bîyo ke sey marêkî boçika xo weno û bi no hewa hem nîşan dano ke peynîya ci yeno û hem zî îxtîmalê domîyayîşê ci esto. Derheqê aqûbetê marî de beno ke vînayîşê ma cîya bî. Ez bi xo zaf qîmet dana dinyaya ke tede sinife, dagîrkerî û sînorî çin î. Goreyê mi ganî merdimî hîna zaf şaristano ke komel û merdim bi girêdayê dewlete gênî dest ser o bivinderî. Çareserîya heme probleman ancax bi agêrayîşê komelê ke dayîke tede hakim a, mumkin a. Labelê merdimîye nizdîyê na nuqta de nîya.”

‘Ez do nizdî bi Kurdî binusa û weşêna’

Balûkenî qiseykerdişê xo de qala ziwanê nuştişê kerda û wina va: “Mi verê cu zî roportajanê xo de vatbi. Nuştiş û weşênayîşê bi Kurdî de lazimîya mi bi prosesê pisporbîyayîş û akademîye esta. Na babete sey amancêk vernîya mi de ya. Beno ke şertanê zîndanî ke mektûbê Kurdî daxî nêresenî destê mi de no tay erey bibo. Labelê rew yan zî erey ez do biresa nê hedefê xo.”

Ma do bêveng nêbî

Balûkenî derheqê nuştişê romanî de va ‘ma hetê tercîhî de bitaybetî nêvanî ma îlleh roman binusî’ û wina dewam kerd: “Ma zaf şertan ra nêewnîyenî û ma hewl danî bicuyî, xover bidî û berardişan bikerî. Ma wazenî ke wa herkes naye ra hayîdar bibo. Ma hewl danî kesê ke wazenî vengê ma bibirnî de bi qelema xo cewab danî. Vera zulmê înan de ziwanê ma yo ke qala heqîqete kena, qet bêveng nêbîyo. Vera dêsanê înan de qelema ma do veng nêvindero.”

 

AMED