TJAye vera qerarê redkerdişê muracatê Ocalanî yê Mehkemeya Heqê Merdiman ya Ewropa de wina va. “No qerar hêrişê îradeya kurdan o. Ganî MHME no qeraro ke qet bingeyê ci yê huqûqî, ehlaqî û merdimî çin o ra biagêro.” Avûkatanê Ocalanî ra Mazlum Dînçî zî va ‘MHME bîya parçeyê sîstemê îşkenceyî’.
Çend rojî verê Mehkemeya Heqê Merdiman ya Ewropa (MHME) muracatê Rayberê Şarê Kurdî Abdullah Ocalanî yê 8 serrî verê kerdbi ser o ronîşte û qerarê redkerdişê muracatî girewte. Seke yeno zanayene avûkatanê Birêz Ocalanî 8 serrî verê seba ke Îmrali de îşkence esto, muracatê MHMEye kerdbî. Qerarê netîceyê muracatî 8 serrî dima ra ame dayene.
Vera qerarê MHME de her ke şono reaksîyonî zêde benî. Tevgerê Cinîyanê Azadan (TJA) vera qerarê MHME de îzehetêko nuştekî da û reaksîyon nîşanê qerarî da. Îzehet de ca dîyayo têkoşînê Ocalanî ser û wina ameyo vatene: “Ocalan heta nika seba ke herikîyayîşê gonîye bivindarno û aştîye awan bibo, zaf têkoşîn da û no qerar xizmetê aştîye, heqê merdiman û sewbîna rê xizmet nêkeno. Tam çepê ci de no qerar şerê înkar û îmha domneno.”
TJAye îzehetê xo de vato ‘no qerar hêrişê îradeya kurdan o’ û wina dewam kerdo. “Qerarê redkerdişê MHME yê 8 serran ra pey, raporê meşrûkerdişê tecrîdo girankerde yê CPTyî xizmetê polîtîkayanê faşîstî yê AKPyî kenî. Dîyar beno ke qerar netîceyê bazaranê sîyasîyan de ameyo dayene. Labelê êdî tehamulê ma ser kurdan ra pêkerdişê dewletanê mîyanneteweyîyan rê nêmendo. No qerar yeno manaya hêrişê îradeya kurdan kerdiş o. Çimkî Ocalan hetê bi mîlyonan kesan ra sey îrade ameyo qebul kerdene. Ganî MHME demêko raver fek nê qerarî ke ti bingeyê ci yê huqûqî, ehlaqî û merdimî çin o ra verabido.”
MHME zî bîye parçeyê sîstemê îşkenceyî
Avûkatanê Ocalanî ra Mazlum Dînçî zî babete ser o qisey kerd. Dînçî dîyar kerd ke qerar 10 serrî ra dima ame aşkere kerdene û no qerarêko huqûqî nîyo û MHME zî bîye parçeyê sîstemê îşkenceyî. Dînçî wina va: “MHMEye vato, ‘gerreyê ci bi xo çin o’. Ma ser nameyê Ocalanî de muracat kenî û xora dima ra Birêz Ocalanî netîceyê nê muracatî zî pers kerdo. Reyna wexto ke ma muracat kerd, ganî dozgerîye ci ra pers bikerdêne. Labelê dozgerîye pers nêkerda. MHMEye bingeyê qerarê xo de raporê CPTyî nîşan dayo. Ma nê hedîseyî ra dima muracatê CPTyî kerdbî. Labelê CPT nêşî Îmrali. Bêhuqûqîye ser o qerarêk nîno girewtene.”
Êdî mîsyonê ci nêmendo
Dînçî peynîya qiseykerdişê xo de va ‘MHME bi nê qerarî bîya parçeyê sîstemê îşkenceyî’ û wina va: “MHME heme vatişanê hukmatê tirkî qerar de nusena û îmze erzena binê vatişanê ci. No qerar nîno qebul kerdene. No zî nîşan dano ke êdî mîsyonê MHME nêmendo. Çimkî xizmetê dewletanê mîyanneteweyîyan keno. Êdî bawerîya ma bi nê dezgehan rê nêmenda û tehamulê ma nê qeraran rê nêmendo. Bi hawayo aşkere aseno ke no qerar netîceyê bazaranê sîyasîyan de ameyo girewtene.”
MERKEZÊ XEBERAN