Mi bi xo hata na roze dewlet û hukumatanê tirkî rê tîvar nêkerd.

Çike na dewlete û hukumtanê tirkî, hata ewro seweta zulmê xo, tertelanê xo keşî ra leborîna xo nêwasta.
Nika onca haştiye ra qesey kenê, hama kerdîsanê xo era xo vîrî nêanê. Reye nêvanê “Ma xiraviye kerda, ma zulm kerdo, ma terteleyî kerde”.
Na semd ra kes gune na dewlet û hukumatî ra tewa mepiyo û cirê tîvar mekero.
Hata ke heqê pêro kesê bindestî nêameyî dayene û dewlete na derheq de gamî nêestê, na hukumat rê zî tîvariye nêbena.
Ala reye niyadê!
Qereqolan virazenê. 400 ra jede qereqolan newe virazenê, hata 150 hebî virastê qedenê.
Haştiye vanê, qereqolan virazenê. Bi naye raştiye de amadekariya herbî kenê.
Eke niyetê xoyo xirvin nêbo, çiyo niyanen nêkenê harhal de.
Seweta haştiye qereqolî lazim niyê! Hama hukumatê AKP virastena qereqolan rameno. Naye ra ma gune biterşîme.
Haştiye vanê, polîtîka xo yê bêînsan verdayena Kurdîstan, bi taybetiye Dersîm, ebe virastena bendawan devam kenê. Nika PKK adir birno,. Dewleta terorîste na dem seweta fêl û emelê xo yê xiravinî ana kar.  Haştiye vanê, qorucu newe cenê kar.
Qeza Agirî Diyadîn de 10 qorucî benê taqawit, hurêndya înan de 50 qorucî newe cerîne kar. Haştiya AKP na wa.
Onca Qileban de 215 qorucî newe cerînê kar, nînan ra 52 tenu çekê xo zî guretê. Haştiya dewleta tirkî na wa.
Hata ewro hukumatê AKP eskera nêkerdo, seweta haştiye sene gaman erzeno.
Heto jû ra haştiye vanê, heto bîn ra operasyonê eskerê tirkî ramenê. Yanî dewleta tirkî terorê xo yê verva kurdan devam kena. Bi hezaran siyasetvanê kurdî hona hepisxanan derê.
Raverdayena taye mehkumanê dawa verva KCK game niya. Nî mordemî hora rehîn amey bîû guretene. Suc û guna nînan hora çîne biye.
Hukumatê AKP seweta xirt kerdena pozîsyonê xo, siyasetvan, rojnamevan, wendekar û avukatî guret bî zerre.